zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
30 Teşrîne 2016 Çarşeme 20:33

Hûmara 93. ya Newepelî Vejîya

Nuştoxanê na hûmare ra Qutbedîn Nurlubaş, Wisif Zîya Döger, Mûsa Şanak û Abdulah Yakişan reya verên a ke kirdkî nusenê. Hesen Polat zî reya verên a ke Newepel de nuseno.

Hûmara 93. ya rojnameyê Newepelî ancî bi nuşteyanê balkêşan û nuştoxanê neweyan vejîya.

Edîtorî nuşteyê xwu de behsê qaydeyê nuştişê herfa "" û herfa "-i" ke "y"ra ver yenê keno. Nuştişê nê her di herfan hem kurmanckî hem kirdkî de problemin o. Edîtor vano "Na babete de, qaydeyo ke Celadet Bedirxan vano, problem vejeno. La qaydeyo ke Ji Bo Rastnivîsînê Ferhenga Kurdî (Kurmancî) - Tirkî de û Grûba Xebate ya Vateyî ma ser o ferz kena zî problem vejeno. Mesela, gama ke ma 'Hêni' bikin 'Hênîyo rindek' yan 'Pali'yî bikin 'Palîyê kirdan' yan zî ma 'di' bikin 'dîyin' û hema gelêk name û çekuyanê sey nînan winî bivurnin, têmîyanekî û zehmetî virazîyenê. Coka qaydeyo maqûl û raşt no yo ke nuştiş de eslê çekuye bêro pawitiş. Çekuyî yan zî nameyî, eslê xwu de bi kamcîn herfe qedîyenê, nuştiş de zî wa tim sey eslê xwu binusîyê."

Meymanê roportajê na hûmare redaktorê keyepelê DersimInfoyî Mahîr Dogan o. Mahîr Dogan roportaj de bitaybetî behsê zehmetîya karê redaktekerdişê nuşteyanê kirmanckî keno, vano "Ha nuştox bo ha wendox bo, her ca ra rexneyî yenê vanê 'Mi fehm nêkerd, na kirmanckîya rastikêne nîya, şima ziwanê ma nêzanê' ûêb. Eke rexneyêko konstruktîf bibîyêne, problem nêbîyêne. La ney! Derdê înan no yo ke her çî tena sey dewa înan binusîyo. Nêbeno ke. Yewna, ehemîyet nêdanê rastnuştişî. Ti se reyî nuşteyî rast bike, xeletîyan rast bike, ancîya reya bîne yewna nuşte bi eynî xeletîyan yeno ra to ver. Hewesê musnayîşî çin o. Vanê, 'Ez sey xo binusî, xora redaktor keno rast!' Wextê însanî gêno, keyfê însanî xeripneno. Bêguman o ke seba redaktoran astengo tewr girs mentalîteyê şarê ma yê kirmancî yo."

Nuştoxanê na hûmare ra Îsmaîl Guvenî nêweşîya psîkolojîke "kleptomanî" ser o nuşto. Husein Muhamedî derheqê çekuyanê Quranî de nuşto. Temaya nuşteyê Hesen Polatî muzîk o; tecrubeyê xwu û muzîkê kurdkî ser o nuşto. Ehmedê Dirihî û Wisif Zîya Dögerî şehîd Doktor Seîd Çürükkayayi ser o nuşto. Qutbedîn Nurlubaşî derheqê fikr û ewnîyayişê cemaetan bi meselaya kurdan de nuşto.

Huseyîn Karakaşî yew hîkaye nuşta, Mûsa Şanak û Abdulah Yakişanî şîîrî nuştê.

Wesîle Doguç yew sanike, Sevîm Aydin zî yew mesela arêdaya. Îsmet Borî folklorê almanan ra yew mesela almankî ra tercume kerda. Necîbe Kirimizigul tarîfê yew werdê ma nuşto, Ehmedê Dirihî nameyê nebatan arêdayê.

Nuştoxanê na hûmare ra Qutbedîn Nurlubaş, Wisif Zîya Döger, Mûsa Şanak û Abdulah Yakişan reya verên a ke kirdkî nusenê. Hesen Polat zî reya verên a ke Newepel de nuseno.

Na xebere 8699 rey wanîyaya
No nuşte hema şîrove nêbîyo.