zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
05 Hezîrane 2013 Çarşeme 08:41

Hûmara 9. ya ŞEWÇILA Vejîya

Na hûmare de zî edîbê neweyî estê; Remzî Gelener bi yew şîîre, Xeyrî Yaşar û Îsmet Bor zî her yew bi hîkayeyêk game eşta sehaya edebîyatê kirdkî.

Hûmara newine ya kovara edebî hunerî Şewçila ancî bi eseranê edebî yê muhîman vejîya.

Na hûmare de di roportajî estê. Roportajê yewin, wendoxanê lîsansê berzî yê Unîversîteya Artuklu ra Remzî Gelenerî çarçewaya şîîre de Roşan Lezgînî reyde kerdo. Roportajê diyin zî, ancî wendoxanê lîsansê berzî yê Unîversîteya Artuklu ra Sevîm Aydin şaîr Akman Gedîkî reyde kerdo.

Na hûmare de hîkaye û şîîran ra teber çend nuşteyê hunerî yê muhîmî estê. Nuşteyo yew bi sernameyê “Averşîyayîşê Lehçeyanê Kurdkî de Rolê Edebîyatî” yê Roşan Lezgînî yo ke hetê edebîyatî ra lehçeyanê kurdkî dano têver. Roşan Lezgîn destpêkê nuşteyê xo de vano “Ziwanêk de estbîyayîş yan çinbîyayîşê ‘edebîyat’î qaso ke ma texmîn nêkenê heyatî û muhîm o. Mesela, pisporî ziwanêk de ‘taybîyayîşê eseranê edebîyan û taybîyayîşê wendox û nuştoxanê aktîfan yan zî qet nêbîyayîş’î mîyanê sedemanê vîndîbîyayîşê ziwanî de sey sedemêkê bingeyênî hesibnenê.” Û na çerçewa de nîşan dano ke edebîyat senî ziwanê xo keno wayîrê şexsîyetî û prestîjê ziwanî berz keno.

Ancî Mahîr Doganî şîîra şaîrê îngilîzan yê seserra 16. Robert Herickî “Azeban rê” tercume kerda û nê tercumeyî ser o analîzêkê ceribnayîşî kerdo.

Sey hûmaranê verênan na hûmare de zî edîbê neweyî beşdarê xebata edebî hunerî ya kirdkî bîyê. Nînan ra yew Remzî Gelener bi yew şîîre, Xeyrî Yaşar û Îsmet Bor zî her yew bi hîkayeyêk game eşta sehaya edebîyatê kirdkî.

Hîkayenuştoxanê mayê muhîman ra Murad Canşad ke rewna ra bi nuşteyanê xo yê kirîtîkkerdişî xîtabê wendoxanê xo kerdêne, badê kitabê xo Xafilbelayî reya verên a ke bi yew hîkayeya muhîme na hûmara Şewçila de ca girewto.

Nuştoxanê cinîyan ra Nadîre G. Aldatmaz, Şeyda Asmîn û Zerîn Azrawa her yewe bi yew hîkaye û Hacer Petekkaya zî bi yew şîîre na hûmare de yê. Nînan ra teber, Adir Dêrsimij û Yaşar Balukenî her yew bi hîkayeyêk, Wisif Pîrbab, Weysel Hanyildiz û Dilo Bargiranî zî her yew bi şîîrêk hûmara newine ya Şewçila xemilnaya.

Na xebere 4102 rey wanîyaya
No nuşte hema şîrove nêbîyo.