Hûmara 88. ya Newepelî Vejîya

Hûmara 88. ya rojnameyê Newepelî bi nuşteyanê balkêşan û muhtewayêka dewlemende vejîya.

Nuştoxanê na hûmare ra Abdulah Koçal ke kurmanc o la kirdkî musayo û na reya verên a ke bi kirdkî nuseno, nuşteyê xwu de serebutanê xwu yê musayîşê kirdkî ra behs keno.

Îsmaîl Guven derheqê psîkoanalîzî de yew nuşte nuşto. Waranê winasîyan de şuxulnayîşê kirdkî zaf muhîm o. Kirdkî çiqas disîplînanê muxtelîfan de bêro şuxulnayîş kapasîteya xwu hende bena hîra.

Huseyîn Çakanî derheqê medyaya kurdan de nuşto û helwêsta kesanê fikirtengan û biteasuban rexne keno ke her çî derdorê xwu ra îbaret vînenê.

Yewna nuşteyo muhîm zî yê Aydin Baturî yo, sey nuşteyanê xwu yê verênan mintiqaya Çewlîgî ra dewa Hacî Çayirî û şîlanêrê ucayî bi ma dayê şinasnayîş.

Emrulah Kaya zî serebutanê xwu yê emrêko ciwan de yanî xortanîye de musayîşê antişê cixara ma rê qal keno.

Edîtor nuşteyê xwu de behsê unîversîteyan de beşê kurdkî keno. Unîversîteya Mêrdînî, Unîversîteya Çewlîgî, Unîversîteya Mûşî, Unîversîteya Dêrsimî, Unîversîteya Diyarbekirî û Unîversîteya Wanî de hetanî nika çend wendekaran wendo, çiqas kesî mezun bîyê, çend kesî nika doktora kenê, datayê nê melumatan dano.

Roportajê na hûmare Mucahîd Dervişoğlu Çewlîg de Yunus Çiftçi dir kerdo. Mamosta Yunus Çiftçi û çend hevalê xwu 2006 ra nat Çewlîg de bi nameyê "Şehri Bingöl Tiyatrosu" yew grûba tîyatroyî naya ro û Çewlîg de fealîyetê hunerê tîyatroyî kenê. Yunus Çiftçi vano "O ke Çewlîg de kulturê xwu di yew kerra nawa kerra ser, ma kayê xwu di yini ra behs kenî.Ma wazenê tîyatroyê Rêncber Ezîzî, Em Heydî, Yadîn Paşayî zî virazin."

Rîpelê cinîyan de Uzlem Doğuç yew serebuta xwu nuşta, Necîbe Kirimizgul zî şaîranê tirkan ra yew şîîra Nahit Ulvi Akgünî tercume kerda û sey hûmaranê verênan werdanê ma ra tarîfê dolmayanê firingîyan nuşto. Wesîle Doğuç yew mesela arêdaya. Şaynebî Laçînî mintiqaya Gêlî ra yew sanike arêdaya, Ebdulqadir Necaranijî zî yew mesela arêdaya.

Alî Şeker û Murad Göçüncüyî her yewî yew şîîre nuşta, Harûn Bozkurtî zî yew şîîra embazê xwu Mehmed Akîf Yilmazî tirkî ra tercume kerda. Nînan ra teber, xeberî, xaçepers, ferhengek û nameyê nebatan rojname de ca gênê.