zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
27 Sibate 2013 Çarşeme 13:12

Hûmara 8. ya Şewçila Vejîya

Edîtor nuşteyê xo de vano “Şewçila, keda ma hemîn a. Ê ke nusenê, ê ke wanenê, ê ke kenê vila, ê ke xizmet kenê, ê ke hetê madî ra ardim kenê...

Hûmara heştine ya kovara edebî hunerî Şewçila bi muhtewayêka dewlemende vejîya.

Edîtor nuşteyê xo de vano “Şewçila, keda ma hemîn a. Ê ke nusenê, ê ke wanenê, ê ke kenê vila, ê ke xizmet kenê, ê ke hetê madî ra ardim kenê... Hemîne rê, bitaybetî embazanê ma yê peyê beran rê zaf sipas. Ma hêvîdar ê ke gamê aver, o tengane ra vejîyê û boya ma nêzdî ra bikewo têmîyan. Werre bi ê kesan ke xo dima yew rêçe verdanê; rêça rindeke, rêça raşte, rêça roşne, a rêça ke boya gulan dana.”

Na hûmare de ancî gelek nuşteyê analîzî, hîkaye û şîîrî estê. Nuşteyanê analîzî ra Abdulah Çelîkî derheqê edebîyatê kirdkî de nuşto û edebîyatê kirdkî de ziwanê qiseykerdişî analîz keno.

Sidqî Hirorî seba wendoxanê kirdkî derheqê edebîyatê kurmanckî yê Kurdîstanê Başûrî de nuşto. Sidqî Hirorî destpêk ra hetanî ewro heme qonaxanê averşîyayîşê edebîyatê kurmanckî yew bi yew qisey keno, hem zî derheqê şîîre, hîkaye û romanî de melumatanê bingehînan dano. Receb Dildarî zî destpêk ra hetanî ewro derheqê hîkayeya kurmancî de nuşto.

Na hûmare de ancî nesrê kirdkî serdest o. La şîîrê zaf rindekî zî tede ca gênê. Şîîran de Bîlal Zîlan, Hacer Petekkaya, Newzat Valêrî, Erkan Tekîn, Wisiv Pîrbab, Bedrîye Topaç û Şeyda Asmîn ca gênê.

Murad Canşadî kitab analîz kerdo, Dilo Bargiranî nuşteyêko estetîk nuşto. Hîkayeyê na hûmare zî Şeyda Asmîn, Zerîn Azrawa, Nadîre Guntaş Aldatmaz, Adir Dêrsimij, Yaşar Baluken, Seyîdxan Kurij, Umer Faruq Ersoz û Erkan Tekînî nuştê.

Kovara Şewçila çilaya şewa edebîyatê kirdkî ya.

 

 

Na xebere 1536 rey wanîyaya
No nuşte hema şîrove nêbîyo.