zazaki.net
25 Teşrîne 2017 Şeme
Girdîya Karakteran : 12 Punto 14 Punto 16 Punto 18 Punto
17 Sibate 2013 Yewşeme 13:56

Hûmara 47. ya Newepelî Vejîya

Xebere: Zazakî.Net

Hûmara 47. ya rojnameyê Newepelî bi muhtewayêka dewlemende vejîya.

Nuşteyê edîtorî yê na hûmare de behsê problemê awanîya Dîyarbekirî beno. Edîtor vano: “Mîyanê bedenî, Ben û Sen, Şehîtlix, Rezan, Seyrantepe, Dîrekxane, dorê Sanayîya kane, Şilbê heme banê yewla yan dila yê. Merdim gama ke nê semtan ra gêreno, seke Malezya ra bigeyro, hende bêrûçik û perîşan ê. Banê ke serranê 1970-80an de bi qaçaxî, bi malzemeyêko ercan wina êretî virazîyayê…

Beledîyeyî eşkenê hêgayan de viraştişê apartmanan qedexe bikerê, ruhset nêdê. Û hetêk ra zî pêşengîye bikerê, nê semtanê kanan de cayê di-hîrê banan de çar dayreyan ser o apartmanêka desla bidê awankerdiş. Yanî cayê çar banan de çewres dayerî virazîyenê. Eke nê semtê kanî newe ra bêrê îmarkerdiş, qîmê des endî nufusê Dîyarbekirî kenê.

Roportajê na hûmare derheqê sihetê domanan de Dr. Silêman Yilmazî reyde bîyo. Dr. Silêman behsê sihetê gedeyan keno û vano: “Pankey wer, awk û cayî ki mîyûn di benî nêweş, weşîy di zav muhîm û. Tedbîr tedawî ra hîna muhîm o. Awka pank, werû pank, lazimî ew cayû pank. Ganî gedey rind îstîrahat bikî, hewnû temam heme çî ra hem vucûdî r’ hemi z’ aql û ruhî r’ lazim û. Televîzyon, komputure ew çîyê sey nînan, hem hewndê gedûn rê hem vextê gedûn rê, hem iz sihetê gedûn rê xirab ê. Manîyê hereket û sporî z’ benê. Ma hereket û spor xu vîr nêkî! Wucûd kenê saxlem, têwgerê însanî kenê sivik, zihnê kê kenê rehet, dormarey zî kê rê kenê dost.”

Na hûmare de nuştoxî zaf ê. Cemal Aydin, Mihemed Bazencîr, Usman Kilinç, Umer Seydaoglu, Fetulah Aydemir û Huseyîn Oktar reya verên a ke dest bi nuştiş kenê. Nînan ra teber Murad Canşad, J. Îhsan Espar, Şeyda Asmîn, Rohelat Aktulum, Zerîn Azrawa, Wisiv Pîrbab, Nadîre Guntaş Aldatmaz, Mistefa Gomayîj, Sunay Tepe, Ozan Kilinç, Mela Eyub Qizilagacî û Mehemed Çelîktenî nuşte, şîîr û arêdayeyê xo dayê weşanayîş.

Nînan ra teber rêzileweşanê rojnameyî ra deyîrê ma Mucahîd Gokerî, nameyê nebatan Ehmedê Dirihî û kayê ma zî Roşan Lezgînî amade kerdê.

Na hûmare de ancî xeberê muhîmî, xaçepers û ferhengekî zî cayê xo girewto.

Newepel biwanîn bidîn wendiş. Bibîn abone, bidîn ciwînayîş.

Na xebere 1513 rey wanîyaya
No nuşte hema şîrove nêbîyo.