zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
17 Kanûne 2012 Dişeme 08:02

Hûmara 43. ya Newepelî Vejîya

Xebere: Zazaki.Net

Hûmara 43. ya rojnameyê yewin yê safî kirdkî (zazakî) bi muhtewayêka dewlemende vejîya. Rîpelê verên yê na hûmare de bale ancîyena vateyanê wezîrê perwerdeyê Tirkîya ke Unîversîteya Çewlîgî de va “Zazakî yew ziwano cîya yo.”

Nameyê rojnameyî ser o yew beyanat ameyo vilakerdiş ke tede wina yeno vatiş: “… seranserê tarîxî de zî û ewro zî “kurd” nameyê “kurmancan”, “zazayan”, “soranan”, “hewramîyan” û “luran” pîya yo. “Kurdkî” zî nameyê lehçeyanê “kurmanckî”, “zazakî”, “sorankî”, “hewramkî” û “lurkî” yo. Yanî eke yew lehçe bi tena sereyê xo kurdkî bo, a zî “kirdkî (kirmanckî, zazakî, dimilkî)” ya. Çunke esas kurdê zazayî xo ra vanê “kird”, hetê Dêrsimî de xo ra vanê “kirmanc”, tayê vanê “dimilî” û tayê zî vanê “zaza”. La sey milet ma kurd ê, ziwanê ma zî şaxêkê kurdkî yo.”

Beyanat wina qedîyeno: “Dewleta tirkan binê nameyê “zazakî kurdkî nîya” de wazena yew polîtîkaya xirabîye bi konetî tetbîq bikero. Coka ma heme miletê xo hîşyar kenê ke çimê xo akerê û rayîr nêdê na polîtîkaya wêrankare. Yê diyin, ma wayîranê na polîtîkaya namerde zî îqaz kenê ke fek kaykerdişê miletê ma ra veradîn. Tarîfkerdişê ma û ziwanê ma hedê tu kesî nîyo!”

Na hûmare de Murad Canşadî zî nuşteyê xo yê bi sernameyê “Deza Xaleza, Biraza! Kırmanc Dimlî Kird Zaza!” de yewna het ra bala xo dano xonamekerdişê ma kirdan ser û vera nê namekerdişî de fehmê ma rexne keno.

Na hûmare de nuştoxanê ma yê cinîyan ra Zerîn Azrawa, Şeyda Asmîn, Hacer Petekkaya, Bedrîye Topaç û Sevîm Aydin bi nuşte, şîîre û arêdayîşanê xo ca girewto.

Pala Muslim, Îsmet Bor, Ehmed Deger, Mistefa Gomayij, Hesê Belê, Mujdat Gîzlîgol û Adir Dêrsimijî zî bi nuşte û şîîranê xo rîpelê rojnameyî xemilnayê.

Çîyo tewr muhîm, sey her hûmare na hûmara ma de zî çend nuştoxê neweyî estê. Nînan ra sere de Sanayî Karakoçî hetê Çemişgezekî ra derheqê zîyaretêkê kurdanê elewîyan de melumatê muhîmî nuştê. Osman Budunoglu, Fatma Çelîker û Enes Bekî zî reya verêne bi arêdayîşê mamikan û çibenokanê kirdkî dest bi nuştiş kerdo. Ma nê her çar nuştoxanê ma yê neweyan ra vanê şima xeyr ameyî.

Nînan ra teber, gelek xeberê muhîmî, xaçepers, notayê deyîran, nameyê nebatan, xaçepers û nuşteyê edîtorî Newepel-43 de cayê xo girewto.

Newepel biwanîn, bidîn wendiş, bibîn abone, bidîn ciwînayîş… 

Na xebere 1906 rey wanîyaya
ŞÎROVEYÎ
ZAZAKİ LO ZIVONİKO AYRU
Said Mirza
bıra tu he hori yari keni no rast von.... akıl hu bıger hu sere.
29 Kanûne 2012 Şeme 12:29