zazaki.net
24 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
12 Êlule 2014 Îne 17:53

Hûmara 42. ya Kovara Vateyî Vejîya

Xebere: Zazakî.net

Hûmara 42. ya kovara kulturî Vateyî ke hetê Grûba Xebate ya Vateyî ra amade bena sey hûmara hamnanê 2014î vejîya.

Na hûmare de rîpel 9 ra hetanî 42 netîceyê kombîyayîşê 24. yê standardîzekerdişê kirmanckî weşanîyayo.

Mehmed Selîm Uzunî bi sernameyê “Mela Mehmed Elî Hunî û Mewlido Zazakî” derheqê “Mewlidîye”yê Mela Mehmedî de yew analîz nuşto û qismê “Mewlidîye” ke alfabeya erebkî ra transkirîbe kerdo, weşanayo. Haydar Diljenî nuşteyê xo yê bi sernameyê “Perwerdeyê Ziwanê Dayîki de Modelê  Swêdkî û Kurdkî” de modelê perwerdeyê di ziwanan ke Swêd de tetbîq beno qisey kerdo. Munzur Çemî, sey dewamê nuşteyê xo yê verênî ke hûmara 41. de weşanîyabi, ancî “Elewîtîye de Çimeyê Bawerî, Tarîxî û Kulturî” ser o nuşto. Îsmet Sîvereklî zî “Elewîyanê Sêwregi” ser o nuşto. Ancî Necîbe Kirimizigul, xebeta xo ya bi sernameyê “Mintiqaya Sêwregi ra Duay û Zewtî” de dua û zewtê mintiqaya xo arêdayê û analîz kerdê. Ehmedê Dirihî bi sernameyê “Bîn-Genç û CHP” yew nuşte nuşto. Îrfan Kuşî bi sernameyê “Trajedî-Komedî û Trajedîya Ê Bînî rê Ewnyayîş” yew nuşte nuşto. Dogan Karasuyî derheqê “Eşq û Waştî” de nuşto. Nuşteyê Umer Barasi zî derheqê “Afrîkaya Başûrî û Nelson Mandelayî” de yo.

Na hûmare de di roportajî estê; o verên Nîhat Elçî û N. CelalîSurgunanê 1925î ra Sabîte Xanime” reyde kerdo, roportajo bîn zî Seyîdxan Kurijî hunermende Sakîna Tenya reyde kerdo. Ancî Seyîdxan Kurijî yew deyîre arêdaya, B. Şîlanî fiqrayî arêdayê û M. Malmîsanijî zî “Vilaweka Peynî” ya komxebata yewin ya unîversîteyanê ke beşê kurdkî tede esto tirkî ra tadaya kirmanckî ser. Akman Gedîkî bi hîkayeya xo ya bi sernameyê “To Xarpêt Nêdîyêne” û Polat Çêrmûgij, Bedrîye Topaç, Hemîd Hozan, W. K. Merdimîn û Mûrad Aygunî zî bi şîîranê xo kovare xemilnaya.

Na xebere 2028 rey wanîyaya
No nuşte hema şîrove nêbîyo.