zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
02 Teşrîne 2012 Îne 15:07

Hûmara 40. ya Newepelî Vejîya

Xebere: Zazakî.Net

Hûmara 40. ya rojnameyê Newepelî ancî bi muhtewayêka dewlemende vejîya.

Nuşteyê edîtorî yê na hûmare de behsê keyepelê Zazakî.Netî beno. Edîtor nuşteyê xo de vano: “ tayê kesî zî estê Zazakî.Net ra îstîfade kenê, qet çime nênusenê. (…) Mesela, Unîversîteya Çewlîgî metnê ke emser sempozyumê diyine de pêşkêş bîyê, sey kitabî çap kerdê. Rîpelanê 500-516 yê kitabî de bi sernameyê “Zazaca Kitapların Tanıtımı” yew meqaleya mudirê Enstîtuya Ziwananê ke Tirkîya de Ciwîyenê ya Unîversîteya Çewlîgî Yar. Doç. Dr. Nusrettin Bolelli zî esta. (…) Meqaleyê xo de vano “Yaptığımız araştırmayla vardığımız sonuca göre…” û behsê gelek çîyan keno la çimeyanê xo nîşan nêdano, nênuseno. Nêvano ez kamca ra nê çîyan musaya yan mi kamca de araştirma kerda. La ha meydan de ke qismêko muhîm yê nê melumatan Zazakî.Net ra, xebata ma ra girewtê.  Edîtor vano, lîsteya kitaban ke peynîya meqale de weşanîyaya zî zafê xo qismê Kitabxaneyî yê Zazakî.Net ra gêrîyayê. La nuştoxî çimeyê xo nênuşto.

Roportajê na hûmare muzîsyen û nuştoxê ma Adem Karakoçî muzîsyena kirmancan Sakîna Teyna reyde kerdo. Sakîna roportajê xo de vana: “Her çî ra ver ganî ma çeyê xo de, domananê xo de kirmanckî qisey bikerî. Ancîna rolê hunermendan warê zonî de zaf muhîm o. Hunermendê ma ganî zonê ma de hunerê xo bivirazî.

Nuştoxanê ma yê cinîyan ra Bedrîye Topaç, Şeyda Asmîn û Zerîn Azrawa na hûmare de nuşteyî nuştê. Camêrdan ra zî Murad Canşad, Qemer Soylemez, Mujdat Gîzlîgol, Dîndar Kamo, Erhan Tosun, Mistefa Gomayij û Rohelat Aktulumî nuşteyî, Sitarê Xelan û Laser Wesar Valêrî zî şîîrî nuştê. Nînan ra, nuşteyê Qemer Soylemez, Erhan Tosun û Dîndar Kamoyî reya verên a ke Newepel de weşanîyenê. Erhan Tosun, reya verên a ke dest bi nuştişê kirdkî kerdo.  

Nînan ra teber, gelek xeberê muhîmî, xaçepers, nameyê nebatan, ferhengek û deyîrê ma rojname de ca gênê.

Bibîn aboneyê Newepelî, biwanîn, bidîn wendiş.

Na xebere 1635 rey wanîyaya
ŞÎROVEYÎ
cevo@hotmail.com
cevo
"Her çî ra ver ganî ma çeyê xo de, domananê xo de kirmanckî qisey bikerî. Ancîna rolê hunermendan warê zonî de zaf muhîm o. Hunermendê ma ganî zonê ma de hunerê xo bivirazî"
Wilahî wes vato la 10 deyîranê Sakina ra yew kirmanckî ya, bi xo ziwanê kirmanckî de neye la kirdaskî de qiseykena... çi rind o ma xo bi xo rê propaxanda keme vindeme....
02 Teşrîne 2012 Îne 16:29