zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
05 Hezîrane 2012 Sêşeme 12:38

Hûmara 38. ya Vateyî Vejîya

Xebere: Zazakî.Net

Hûmara 38. ya kovara Vateyî ke hetê Grûba Xebate ya Vateyî ra amade bena vejîya.

Na hûmare de nuşteyo tewr muhîm cigêrayîşê J. Îhsan Esparî yo ke bi sernameyê “Kurdê ke 1937 de Seba Hewara Dêrsimî Veşayî û Kişîyayî: Şêx Evdirehîm û Embazê Ey” o. Di kasetê ke M. Salih Dalî derheqê hedîseya şehîdbîyayîşê Şêx Evdirehîm û embazanê ey de qisey kerdê, bingehê nê nuşteyî yo. La mamosta J. Îhsan Esparî çarçewaya na mesela û muhtewaya qiseykerdişê M. Salih Dalî de ke demeyê hedîsa de pancêsserre bîyo, cêrnotan de gelek melumatanê muhîman bi dîqet pêşkêş keno. Bi nê nuşteyî meseleyê şehîdbîyayîşê Şêx Evdirehîm û embazanê ey gelek hetan ra zelal beno.

Mamosta Munzur Çem nuşteyê xo “Folklor û Bawerîya Kurdanê Dêrsimî ra…” de, Bava Nêzdî de qisey kerdo. Çîyê ke Bava Nêzdî derheqê bawerîya elewîyîye de vatê, ey zî nuştê.

Hîkmet Çalaganî bi nameyê “Hesabo Şaş” û Sînan Sutpakî “Eşqê Dewa Bexçeyî” hîkayeyî nuştê. Alî Aydin Çîçekî muzîsyen Soner Soyerî reyde yew roportaj kerdo. Weysel Otunçî çend deyîrê heskerdişî hetê Gimgimî ra arê dayê. Nîhat Çelîkî Kazimo Zurnecî û Alî Beytaşî zî Yilmaz Guney dayo şinasnayene.

Nînan ra teber na hûmare de Alî Aydin Çîçekî bi nameyê “Merdena Bêvenge”, Deniz Gunduzî bi nameyê “Omid” û Orhan Zuexpayijî bi nameyê “Werre Çolîg” şîîrî dayê weşanayîş. Newzat Valerî yew şîîra Ehmed Arifî û Murat Aygunî zî yew şîîra Murathan Munganî tadaya. Akman Gedîkî bi nameyê “Koseyo Çimvêşan” yew sanike daye weşanayîş.

Îsmet Sîvereklî bi sernameyê “Cihudê (Yahudîyê) Sêwregi” de behsê cihudanê ke zemanêk Sêwregi de ciwîyayêne keno. Mehmed Selîm Uzun zî behsê kombîyayîşê 21. yê Grûba Xebate ya Vateyî keno ke 08-11 nîsane 2012 de Çewlîg de virazîyabi.

Na hûmare de netîceyê kombîyayîşê 20. yê Grûba Xebate ya Vateyî ke payîzê 2011î de Mêrdîn de virazîyabî zî weşanîyayo.

Na xebere 1553 rey wanîyaya
No nuşte hema şîrove nêbîyo.