zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
22 Oktobre 2018 Dişeme 07:56

Hîkmetê Ziwanî

Roşan Lezgîn

Şaîr û edîbê pîlî, alimî, fîlozofî û mutefekirê ke fikrê neweyî ardê meydan, ancî pêşewayî, lîderî û qumandanê ke milet û artêşî îdare kerdê, zafê serkewtişê xwu esas deyndarê ziwanî yê. Çimkî, pêxemberî zî tede, çiyo ke merdimanê pîlan ra bala mi anceno, înan ziwan zaf pank, zaf rindek, zaf weş, zelal û fesîh, bêqisûr û krîstalîze şixulnayo. Hetanî ewro hetê şixulnayişê ziwanî ra mi eseranê merdimanê pîlan de qisûr nêdî. Ez mexsûs ziwanê înan ser o şixulîyaya, la ez nêeşkaya yew cumleya înan, tenya yew cumle newe ra bi hawayêna saz bikerî. Nê, mumkin nêbi!

Coka ez vana qey merdim çiqas ziwanî ra hes bikero, çiqas zerrî ra bala xwu bido ziwanî ser, muhabetê merdimî û ziwanî çiqas weş û zerrî ra bo, merdim çiqas qedir û qîmet bido ziwanî, çiqas rindek û fesîh bikar biyaro, ziwan zî vera enê qedirzanayişî de bi comerdîye berê hîkmet û esrarê xwu merdimî rê akeno; dîyayiş, xeyalkerdiş, fikirîyayiş, tesewurkerdiş, afernayiş û îfadekerdişê merdimî keno zelal û sade, fikir û îfadeyê merdimî bêqisûr sîstematîze keno. Û xwura, tefekurê ma reng û şeklê xwu dano heyatê ma...



Xet: Yusuf Mazî (Hîç, celî tealiq)

Na xebere 1672 rey wanîyaya
No nuşte hema şîrove nêbîyo.