Heştê adare to rê bimbarek bo!

Roja to bimbarek bo maya cuye!

Roja to bimbarek bo şewa bêşewdire!

Heme şaîrî şîîran de to nusenê. Ti şîîran xemelnena misra bi misra. Ti bena nameyê eşqî ginena şaristanan ro, ginena dugelan ro. Bê to lozinan ra dû nêvejîno. Bê to haştîye rîyê erdî ra heredîna. La çi heyf ke hendayê şîîre asan nîya cuya to.

Heme demserrî destanê to de ruwîyenê. Sewdayê qedîmî rindekîya to ra ruh cênê. Bê to wareyî tal manenê. Ti bena sixletîye, vengê rindîye zedênena. Laserî bi hesiranê çimanê to weye benê. La çi heyf ke hendayê şilîye rindeke nîya cuya to.

 Roja to bimbarek bo waya herre.

Roja to bimbarek bo vila tewr rindeke.

Vengê xo bizêdne. Xelasa to tena destanê to der a. Yewna dinya tena bi zerrîya to virazîna. Yewna cuye tena bi to bena zergune.

Heştê adare to rê bimbarek bo!