Grûba Xebate ya Vateyî Dîyarbekir de Kom Bî

Grûba Xebate ya Vateyî kombîyayîşê xoyê 19. Dîyarbekir de viraşt. Na rey 21 endamê grûbe cayanê cîya-cîyayan yê welatî, Tirkîya û Ewropa ra beşdarê kombîyayîşî bîy.

Grûbe rojanê 21-24.04.2011 de Dîyarbekir de kom bî. Roja verêne çend qaydeyê rastnuştişî amey tesbîtkerdiş. Dima tayê çeku û termê neweyî sey formê standardî qebul bîy. Hîrê rojanê peyênan de zî seraser termê îdarî yê beledîye amey viraştiş.

Roja hîrêyine ya kombîyayîşî de grûbe komela Ziwan-Komî û rojnameyê Newepelî zîyaret kerd. Şan de zî buroyê Weşanxaneyê Vateyî de yew şahîye virazîya. Buro de grûbe ra teber gelek wendoxê kirdkî zî amade bîy. Doxan Taşkin û Tekîn Agacikî stand-apî pêşkêş kerdîy. Malmîsanij û J. Îhsan Esparî şîîrî wendîy. Mehemed Selîm Uzun û Doxan Karasuyî têreyra yew deyîra Rêncber Ezîzî vate. Munzur Çem, Îshaq Tepe û Polat Aydinî zî fiqrayî vatîy.

Kombîyayîşê 19. de qerar gêrîya ke Nûredîn Celalî zî beşdarê Grûba Xebate ya Vateyî bibo. Kombîyayîşê 20. zî, qerar gêrîya ke Mêrdîn de bivirazîyo û bi giranîye termanê hunerî ser o bêro vindertiş.  

Endamanê Grûba Xebate ya Vateyî ra Cemal Pîranij, Deniz Gunduz, Doxan Karasu, Ehmedê Dirihî, Huseyîn Kulu, Îshaq Tepe, J. Îhsan Espar, M. Malmîsanij, Mehemed Selîm Uzun, Mehmud Nêşite, Munzur Çem, Muzafer Xeylanij, Netîce Altun, Polat Aydin, Roşan Lezgîn, Serdar Bedirxan, Seyîdxan Kurij, Silêman Yilmaz, Şukrî Urgun, Tekîn Agacik û Zulkîf Demirtaş beşdarê kombîyayîşê 19. bîy.