Faydeyê Zebeşe

Vanê, rojêk Mela Menşûr vano, “Mi rê wina meyweyêk bîyarêne ke hem ez biwerî, hem herê mi biwero û hem zî ez xo rê rayîr ra pê hewîya xo bîyarî.” Kes nêzano no kamcîn meywe yo. Dima Mela Menşûr bi xo vano, “Na meywe zebeş a. Ez zereyê aye wena, herê mi toleyê aye weno. Dima ez xo rê pê dendikanê aye çerez kena û hewîya xo ana.”

Se ra neway û pancê (% 95) zebeşe aw a. Coka xasîyetê zebeşe yê pakkerdişî esto. Xasîyeto tewr muhîm yê zebeşe, velgan şuxulnena, îdrarî erzena teber. Sola ure û uratî ke velgan de esta, pank kena. Qum û kerrayanê velgan helnena, erzena teber.

Zebeşe neke tena velgan pak kena, vîtamînê B û C zî tede estê. Madeyê “likopen”î ke zebeşe de esto, vera tehlûkeyê enfarktusî de qelbî muhafeze keno.

Çîyo balkêş no yo ke sey zafê zebze û meyweyanê bînan, xida qalikê zebeşe de yo. Coka hetanî ke mumkin o ganî qismê sipî ke mîyanê sûrayî û keweyîya toleyî de yo, o bêro werdene. Madeyê “citrulline” ke zebeşe de esto, se ra şeştîyê ey mîyanê nê qalikê spî de peyda beno. Eke merdim zêde ra zebeşe biwero, no made enzîmanê wucûdî reyde keweno reaksîyon û dima vuryeno beno asîdê bi nameyê “arginine”. No made zî enerjîya cinsî zêdneno. Yanî, zebeşe eynî sey Vîagra reyanê wucûdî akena û virazîyayîşê ereksîyonî garantî kena. Abîyayîşê reyayan eynî wext de seba qelbî û sîstemê sîrkulasyonê gonî û werdî zî hol o.

Kesê qelewî ke wazenê demeyêko kilm de zaf kîlo bidê, ganî rejîmê zebeşe bikerê. Seba ke awe tede zaf a, şeker tede esto û teberkerdişî zêdnena, coka zebeşe leze kîloyanê merdimî helnena. Labelê ganî merdim nê demeyî kilm bigîro û tena zor nêdo werdê zebeşe, sewbîna xidayan zî bigîro.

Labelê seba ke merdim zebeşe ra tam fayde bivîno, ganî merdim bi pîzeyo vêşan, werdî ra ver biwero. Çunkî werdî ra pey bêro werdene, beno ke hemêyayîş de problemî vejîyê. Heto bîn ra, her mewye wextê xo de bêro werdene, hîna hol o. Mesela, zebeşe yew meyweya hamnanî ya. Coka merdim hamnanî zebeşe biwero, hîna hol o.