Ewropa de Serdemê Qeşa

Pisporê meteorolojî yê Îngilîstanî şarî hîşyar kenê ke seba “sedemêkê qeşayî yê mînî” xo amade bikerê.

No zimistan Ewropa de hewa zaf serd o la pisporî vanê do hîna zî serd bo. Vanê senî ke 327 serrî verê cû royê Thamesî cemidîyabi, do hewna wina serd bo.

Pisporê hewayî Brian Gaze vano, aşmê çele û sibate do her wextî ra vêşêr serd bê, qet suprîz nîyo ke hewayo serd hetanî nêmeyê aşma adare dewam bikero.

Pisporê meteorolojî Ian Michael Waite zî vano, ma wina texmîn kenê ke aşma çeleyî do normal ra vêşêr serd bo, îhtîmal nîyo ke ma demeyêkê kilmî de nê serdemê qeşa yê mînî ra vejîyîn.

Seke tarîx de behs beno, vanê, zimistanê 1683-84 de royê Thamesî hende cemed girewtbi ke serê çemî de fuarî abibîy, şarî estorî dabîy vazdnayîş, hoqebazan numayîş kerdbi.