zazaki.net
24 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
09 Temmuze 2011 Şeme 20:09

Ewnîyayîş - Muhakeme - Qenaet!...

Roşan Lezgîn

Gama ke ma ewnênê meseleyêk, bîyayîşêk, qewimîyayîşêk, karêk yan zî fenomenêk ra, derheqê ê çî de ma benê wayîrê fikrêk û goreyê nê fikrî ra ma muhakeme kenê, derheqê ê çî de qenaetêkê ma virazîyeno. La esas seba ke ma tena hetêk ra ewnênê, beno ke ma eslê çî nêvînenê, coka derheqê ê çî de ma benê wayîrê fikrêkê kêmî yan zî şaşî û ma bi nê fikrê nêmcetî yan zî şaşî muhakeme kenê. Peynîya nê muhakemeyî de zî qenaetêko şaş ma de virazîyeno.

Ca yan zî heto ke merdim ewnêno, zaf muhîm o. Ge-ge merdim hetê rastî ra, cayo rast ra nêewnîyo, merdim rastîye nêvîneno. Ez vana qey bi nê hîrê fotografan ez do meremê xo hîna baş bidî fehm kerdene.

No fotografo cêrin, yê yew çî yo. La hîrê hetanê cîya-cîyayan ra ameyo antene.  

Seke aseno gama ke merdim ewnêno fotografê yewinî ra, eysayîşêko bêmana keweno verê çimê merdimî. Merdim nêeşkeno yew mana bido nê çî ke fotograf de aseno.

Fotografo diyin yewna het ra ameyo antene la ancîna tede çîyêko manîdar çin o. Tena merdim vîneno ke tayê kîsikê boksî bi têl ameyê aliqnayene.

Haaa! Mesela fehm bî. No eserêkê hunerî yo. Muhteşem o.

Pê kîsikanê boksî ke bi têl ameyê aliqnayene, resmêkê hunerî yê boksorê namdarî yê cîhanî Muhammed Ali Clay ameyo viraştene.

No esero muhteşem hetê hunermend Michael Kalishî ra ameyo viraştene. Michael serra 2008î de şewêk hewnê xo de vîneno ke kîsikê boksî sey hêsrê çiman cor de yenê war û hewa ra vindenê, nê kîsikan ra sûretê boksorê namdarî yê cîhanî Muhammed Ali Clay virazîyeno.

Hunermend Michael Kalish, dima çîyo ke hewnê xo de dîyo, eynî bi o qayde nê eserî virazeno. Viraştişê eserî de 2500 heb kîsikê boksî, 10500 metre têlo ke zingar nêgêno û 1100 metre zî lulîyê alemînyumî xerc kerdê.

Çîyo tewr muhîm yê nê eserê muhîmî no yo ke, tena hetêk ra, yanî eke merdim cayo rast ra biewnîyo, eslê eserî vîneno. Sewbîna, ti kam hetî ra biewnîyê, tu mana tede nêasena.

Xora heyat de zî zafê çîyan wina nîyê? Seba ke ma hetê rastî ra, cayo rast ra nêewnênê, zafê çîyan ma rê şaş asenê yan zî ma derheqê ê çîyan de benê wayîrê qenaetêkê şaşî.

Muhîm o yo ke merdim bieşko çend hetan ra biewnîyo. Belkî o wext derheqê çîyan de merdim bibo wayîrê qenaetêkê maqulî.   

_________

Not: Nê fotografî camêrdêk bi nameyê Lezgîn A. Çalî ke ez ey nêşinasnena, tayê melumatan a bi e-mail mi rê şirawitê.

Na xebere 1702 rey wanîyaya
No nuşte hema şîrove nêbîyo.