zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
22 Sibate 2013 Îne 01:10

DÎSA de PANEL

Munaqeşeyanê Ziwanê Dayîke û Zafziwanîye de Dîyalektê Kurdkî: Zazakî û Kurmancî
Qiseykerdox: Roşan Lezgîn

21 sibate Roja Ziwanê Dayîke yê Cîhanî ya û hemeyê dinya de bitaybetî hetê şaranê ke ziwanê înan ameyê qedexekerdiş, tada dîya û tehqîr bîyê ra pîroz bena. Sedemo ke na roje sey Roja Ziwanê Dayîke ameyo qebulkerdiş zî no yo ke, roja 21 sibate 1952 de aktîvîstê ziwanî yê şarê Bangladeşî ke zafê xo wendekarê unîversîte bî, gama ke seba ziwanê xo numayîş kerd, hetê polîsan ra ameyî kiştiş ra dest pêkeno. Na bîyena ke ma behsê aye kenê, badê ke dewleta Pakîstanî ziwanê urduyan sey ziwano tekane yo resmî îlan kerd, bitaybetî bi beşdarbîyayîşê wendekaran hetê aktîvîstanê ziwanî yê bangladeşîyan ra no numayîş virazîyeno. Na roje ra pey, seba yadkerdişê nê aktîvîstan û seba ke vernî ro vîndîbîyayîşê bilez yê ziwanan bigêrîyo, hetê Lijneya Zanist û Perwerdeyî yê Yewîya Neteweyan (UNESCO) ra roja 21 sibate sey Roja Ziwanê Dayîke îlan bîya.

Amanc zî no yo ke hem aktîvîstê bangladeşî bêrê yadkerdiş hem zî derheqê ziwananê cîya-cîyayan ke hetê polîtîkayanê dewletan ra yenê vîndîkerdişde warê cayî û gerdûnî de yew ferqkerdiş bêro meydan, ziwanî dezgeyanê resmîyan de (sey perwerdeyî) bêrê bikarardiş û muhafezekerdiş, vernî ro vîndîbîyayîşê zaftewirîya ziwanî ya dinya bêro girewtiş.

Ma sey dezgeyê DÎSA ke wazena kurdkî perwerde de û her warê rayapêroyî de bi hawayêko azad û seypê bêro bikarardiş û seba naye mucadele kenê, bi munasebetê 21ê sibate Roja Ziwanê Dayîke, ma hewce vînenê ke ancî îfade bikîm ke ma perwerdeyê bingeyê ziwanê dayîke ser o cuyêka zaf-ziwan û zaf-kulturî ya demokratîke ra bawer kenê û piştgirîya naye kenê. Çarçewaya programê ma yê “Verî Ziwanê Dayîke” de ma xebata xo ya derheqê na roje seba lehçeya kurdkî zazakî kenê dîyarî ke “Atlasê Ziwanê ke Binê Tehlukeyî de” yê UNESCOyî de ca gêna. Verî ma wazenê di broşurê ke ma bi zazakî amade kerdê pêşkêş bikîn (www.disa.org.tr).

Roja 27 sibate 2013, Saete 17:00 de Enstîtuya Cigêrayîşanê Sîyasî û Sosyalî yê Dîyarbekirî (DÎSA) de ma do bi sernameyê “Munaqeşeyanê Ziwanê Dayîke û Zafziwanîye de Dîyalektê Kurdkî: Zazakî û Kurmancî” de yew aktîvîte virazîm. Nuştox Roşan Lezgîn ke hem amadekerdişê nê broşuranê bizazakî de hem zî averberdişê zazakî de wayîrê cayêkê muhîmî yo, do qisey bikero. Eke şima zî nê suhbetî de cayê xo bigîrê ma zaf şa benê.

Wext: 27 Sibate 2013, Çarşeme

Ca û Saete: DÎSA, Saete 17:00

Adrese: Mimar Sinan Cad. Aslan Apt. B Blok No: 12

Yenişehir/ Dîyarbekir

Tel: 0 412 228 14 42

 

Na xebere 1569 rey wanîyaya
No nuşte hema şîrove nêbîyo.