zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
02 Hezîrane 2011 Panşeme 09:30

Behrî Axa û Rexne

Enwer Yilmaz

Axayîya Behrî Axayî pîyê ey ra ci rê mendbî. Axayîya Behrî Axayî sembolîke bî. Pîyê ey xidar bîyo û dewijan ser o timûtim heqaret kerdo. Labelê Behrî merdimêko nerm bi. No semed ra dewijan ser o pîlîye û axayîye nêkerdêne. Sey dewijan ciwîyayêne. Labelê se bikerdêne zî nêşkayêne damara axayîye xu de bibirno. Behrî Axa neke tena dewijan ra, şarê xu heme ra hes kerdêne û tim azadîye ser o fîkirîyayêne. Mabeynê ey û dewlete zî nê sedemî ra xerepnaye bi.

Rocêk gerreyê ey beno. Eskerî şinê dewe, Behrî Axayî tepîşenê û anê erzenê hefs. Wexto ke dekewt hefs, ame qawîşa sîyasîyan. Labelê Behrî Axayî qalkerdiş û ciwîyayîşê hevalan ra çîyê fehm nêkerdêne. Xu rê sey xu ciwîyayêne û qalî kerdêne. Ne ciwîyayîşê rêxistine zanayne ne zî sosyalîzm ra çîyêk fehm kerdêne. Dîsîplînê zerreyê hefsî ey rê zaf zor ameyêne. Saeta perwerdeyî de hewş de gêrayêne û saeta wendişê kitaban de zî kewtêne ra. Her kes ey ra ecêb mendêne.

Behrî Axayî qural û nîzam nêzanayne. Hevalî zî pabeyê kombîyayîşî vindertêne ke Behrî Axayî rexne bikerê. Çimkî uca heme kesî resayêne pê.

Rojêk kombîyayîş virazîya. Heme hevalî amey pêser û Behrî Axayî ra va, bê beşdar bibe. Behrî Axayî va, ez nêna, şima şêrê. Hevalan va, qayde wina yo, ganî ti zî bêrî. Ey va, no kombîyayîş semedê çî vîrazîyeno? Hevalan va, kombîyayîşê ma semedê “kişilik çözümlemesi” beno. Behrî Axayî va, kişîlixê ma de çi esto? La hevalan ey ra va, ganî ti bêrî mîyanê kome de cayê xu bîgêrî, ma xu rê suhbet kenê, tayê babetî estê, gerek ma ser o bivinderê.

Ameyî roniştî û Behrî Axayî ra dest pêkerd. Hevalan o girewt mîyanê xu û yow bi yow o rexne kerd. Tabî Behrî Axa bi sûr. Ma vajî ke ciwîyayîşê ey de hevalan gore çi xeletî estbî, hevalan da rîyê ey ro û o rexne kerd.

Xulasa hevalan va, “yoldaş feodal alışkanlıklarını terk etmiyor, köylü sınıf eğilimleri taşıyor…” Yani, hogir xuyê xo yê feodalîye terk nêkeno, meylê sinifê dewijîye keno…

Behrî Axa zaf hêrs bi. Werişt va, lawo eyb o, şima mi rê komplo vîrazenê! Hevalan zî va, ma “eleştiri” û “özeleştiri yöntemi” şuxulnenê. Qaydeyê ma wina yo.

Behrî Axa nêame rayîr. Va, wilay yê şima qet “eleştiri-meleştiri” nîya, fesadî û bawkê fesadî ya!

Na xebere 3311 rey wanîyaya
No nuşte hema şîrove nêbîyo.