Grûba Xebate ya Vateyî Dîyarbekir de Kom Bîye

Grûba Xebate ya Vateyî ke 1996 ra nat seba tespîtkerdişê qaydeyanê gramerî û standardîzekerdişê kirmanckî (zazakî) xebitîyena, kombîyayîşê xo yê 22. Dîyarbekir de kerd.

Grûbe roja 31.10.2012 de Dîyarbekir de dest bi kombîyayîşî kerd. Roja 02.11.2012 de, yanî hîrê rojan de kombîyayîşê xo temam kerd. Temaya nê kombîyayîşî qismêkê nameyê meslegan, termê trafîkî û kirmanckî de termê nazikvajîye bî.

Endamê Grûba Xebate ya Vateyî ke beşdarê kombîyayîşê 22. bîyî nê yê: M. Malmîsanij, Munzur Çem, J. Îhsan Espar, Mehemed Selîm Uzun, Roşan Lezgîn, Serdar Bedirxan, Deniz Gunduz, Mehmud Nêşite, Huseyîn Kulu, Nûredîn Celalî, Haydar Diljen, Cemal Pîranij, Şukrî Urgun, Muzafer Xeylanij, Tekîn Agacik, Netîce Altun, Zulkîf Demirtaş, Îbrahîm Bîngol, Doxan Karasu û Polat Aydin.

Grûbe qerar girewt ke Nadîre Guntaş Aldatmaz zî sey endama grûbe kombîyayîşanê ameyeyan de beşdar bibo.

Demeyê kombîyayîşî de serekê beledîyaya girde yê Dîyarbekirî Osman Baydemir û mudîrê dayreyê kulturî yê beledîye Muharem Cebeyî grûbe zîyaret kerde.

Grûbe hetanî nika 15 rey Ewropa de reyêke Dêrsim de, reyêke Mêrdîn de, reyêke Çewlîg de û bî çar rey zî Dîyarbekir de kom bena.