zazaki.net
28 Adare 2024 Panşeme

Murad Canşad / Nuştox

Waştena Zerrî û Nêwaştiş…

26 Sibate 2011 Şeme 09:55

Vanê, keso ke zerrîya xo bi karêk esta, ci rê rayîrêk peyda keno; eke çin a, mahaneyêk (bahane) peyda keno.

Ez na qisa kamî ser o vana?

Serekwezîr Erdoganî ser o…

Heqê merikî nêno werdene; xurt o Erdogan, çust o.

Xurt û çustê çiyî yo?

Yê îqtîdarbîyayîşî yo.

Duşte (hemver) hende dek û dolaban de, fend û fêlbazîye de çimê xo îqtîdar ra nêgirewt mêrikî. Cehd kerd, ci rê rayîrêk ney çend rayîrî peyda kerdî; bî serekê beledîya, bî serekê partîye, bî serekwezîr. Wina aseno ke hetanî Çankaya rayîrê xo esto.

Ya, Erdogan rayîrê îqtîdarbîyayîşî zaneno. Zerrîya xo bi nê karî esta.

Ma çarekerdişê meseleyanê Tirkîya?.. Mîsalan, meseleyê kurdan?..

Sereyê Erdoganî de nê meseleyî ser o teba esto çin o, ez nêzanena. Beyanatanê ey ra şan û şodir bellî nêbeno. La o rew-rew bi sitemkarîye vano: Tam ma xo hazir kenê ke gamek bierzê, dest erzenê bi çokan, bombayan teqnenê, hedîseyan vejenê, rayîr bi ma birnenê.

Derê, mêrik rast vano, zerrîya safe ra qisey keno?

Pê yeqîn nêkena ez. Bi nezerê mi, rast nêvano.

De ma hebêk rojanê verênan, hewt-heşt serranê payênan bîyarê xo vîr.

3ê teşrîne 2002 de vîjnayîşê parlamenteran ame kerdene, partîya Erdoganî bîye îqtîdar. Parlamento hema-hema 2/3 înan dest de bî. O wext kesî dest nêeştîbî çokan, bombayê nêteqnayênê; demê “adirbes”î bî. Hetanî key? Hetanî 1ê hezîrane 2004. Yanî 19 mengî kesî bêçîka xo nêkerdîbî linga çeke ser.

Ma o wext Erdoganî se kerd? Meseleyê kurdan ser o persêk ci ra amebî pers kerdene, ey vatîbî: Şima ke mefikirîyê, meseleyêko winasî çin o.

Maşela, Heq linga mêrikî kemere meverdo, çi aqil tede esto!

Tebaxa 2005î de Erdogan şî bi Dîyarbekîr, behsê çîyanê musbetan kerd. Dewletê pîlî ê yê ke xeletîyanê xo vînenê, bi xeletîyanê xo yenê têrî, vat. Naye ser o, hetanî mangêk adirbes ame îlan kerdene.

Erdoganî se kerd? Ci ra veng nêvejîya Kombîyayîşê “MGK” dima doçika xo ser o ronişt. Meylê xo “nêfikirîyayîş”î ser o bî.

Gulana 2007î de serekkomaro newe ameyênê vîjnayene. No vîjnayîş seba çarekerdişê meseleyê kurdan firsendêk bî. Beno ke kêmî bibê zî heqê kurdan yenê dayene, no mesele bêgonî çare beno. Teşrîna 2006î ra hetanî 15ê gulana 2007î adirbes ame îlan kerdene. Tarîxê vîjnayîşê serekkomerî ke bi nêzdî, qisimêke eskeran, nîjadperestan, kemalîstan, ergenekoncîyan û çetecîyan dest bi provakasyonan kerd. Hukmatî qerar grewt ke vîjnayîşê parlamenteranê ke hîna serrêka xo menda, a sere 22 temuze de bêro kerdene. Naye ser o, adirbes zî hetanî tebaxa 2007î ame taloq kerdene. Yanî hetanî 10 mengan eyam sukit bî.

Erdoganî se kerd? “Xanima mi zî başurê rojhelatî ra ya” vat, Emîna Xanime sîyasetî ra kerde malzeme.

Hîna ke 2008 nêqedîyayo, payîz ra meseleyê kurdan ame rojevê Tirkîya. Mesela bi cesaret a ame munaqeşe kurdane, kêmî bibê zî tayê gamê musbetî ameyî eştene. Naye ser o ancî adîrbes îlan bî, hetanî hezîrana 2010î, yanî hetanî 20 mengan ne çekî teqayî ne bombayî…

Erdoganî se kerd? Vejîya bi meydan û vat: Tirkîya ra hes kenê hes bikerê, hes nêkenê; cehennemeyê şîma!...

Nika ancî adirbes îlan bîyo. Wextê îqtîdarê Erdoganî de adirbeso pancin… O yo ke nika ra eşkera bîyo, hetanî 20ê êlule eyam sukit o. De goşê ma ser o yo; Erdogan nafa se vano, se keno?... Ancî çi mahane peyda keno?

No nuşte 1270 rey wanîyayo
No nuşte hema şîrove nêbîyo.