Xelet Famkerdiş - Xelet Nîşandayiş!
Zafê reyan merdim nêeşkeno her çî tam raşt bivîno, raşt fam bikero, raşt bizano, raşt îdraq bikero…
Tayê çî, seba ke hîkmet tede esto, seba ke sergirewte yê, seba ke mehnaya ci ma rê akerde nîya, coka aqil û hewseleya ma aciz a ke esil û esasê ci, mahîyetê ci bizano. Yanî seba famkerdişî zanayişê ma qîm nêkeno.
Tayê çî estê, seba ke a game ma mahîyetê ci nêzanê coka ma xelet fam kenê. Yanî seke ma dîyo yan şinawito, eslê xwu de o qeyde nîyo. Badê ke ma mahîyetê ci mûsenê, hema newe mesela ma rê zelal bena.
Tayê çî zî estê, bi zanayiş tewirêna yenê nîşandayiş; enê çî hîna zaf siyaset de benê. Çimkî siyaset bi xwu sinetê hîleyan o! Qismêko muhîm yê hereketê siyasî yan kesê siyasî, seba ke biresê hedefê xwu zafê reyan bi zanayiş esil û esas û mahîyetê îşî nimnenê yan zî bi yewna hawa nîşan danê. Heta ke merdim pê hesyeno, Hasil Mûsil ra vîyareno!
Neke tena hereketê sîyasî yan zî kesê sîyasî winî kenê, zafê reyan merdimê sadeyî zî eşkenê seba amancêk xwu yan zî vate û hereketanê xwu tewirêne nîşan bidê yan zî qesten yewna hawa têwbigeyrê.
Quran de Sûreya Kehfî de çar qisayî estê; a verîne ayeta 9. ra hetanî 25. qisaya Eshabê Kehfî ya, diyine ayeta 32. ra hetanî 42. derheqê di merdimanê wayirê rezan de ya, hîrêyine ayeta 60. ra hetanî 82. miyanê Mûsa û Xizirî de vîyarena û çarine zî ayeta 83. ra hetanî 98. derheqê Zulqarneynî de ya.
Qisaya ke miyanê Mûsayî û Xizirî de vîyarena, seke mi va, seba têkilîya miyanê ma însanan yew nimûneyo zaf balkêş o. Çimkî eynî çî zaf ameyê ma hemîne sere de. Ma vajê, tayê vateyî, tayê hereketî/reftarîyî estê, seba ke ma a game mahîyetê înan baş nêzanê, ma xelet fam kenê. Badê pey gama ke ma mahîyetê ci mûsenê, hema ma tede vejenê ke verê cû ma xelet fam kerdo. La Homa zano, belkî zaf çî estê ke heta bi heta heşê ma de xelet manenê…
Qisaya ke mi va, Quran de Sûreya Kehfî de miyanê Mûsa pêxamberî û Xizir eleyhîselamî de vîyarena, mi mealê ci Kirdî de winî amade kerd:
Bi nameyê Homayê rehman û rehîmî
(…)
60. Wextêk Mûsayî xortê xwu ra vatbi "Ez nêvindena nêarisîyena; ez xwu resnena heta cayê ke her di deryayî resenê pê, yaxud ez do bi serran rayir şêrî."
61. Her di gama ke resayî cayê ke di deryayî resenê pê, înan maseyê xwu kerd xwur vîr ra. Maseyî derya de rayirêk girewtbi şibi.
62. Gama ke [cayê pêresayişê xwu ra] vîyartbî şibî Mûsayî xortê xwu ra va "Areyîya ma biyare. Heqîqeten rîyê ena raywanîya ma ra [epey] zehmetî ameyî ma sere de."
63. [Xortî] va "Ehe, to dî! Gama ke ma xwu zinar de setirnabi mi mase kerd xwu vîr ra. Şeytanî ra teber kesî o mi vîr ra nêkerd. Ey bi hawayêko heyret behr de rayirê xwu girewtbi şibi."
64. Mûsayî va "Oyo ke ma ci geyrayne o bi." Tavilî rêça xwu ro apey ageyrayî.
65. Welhasil înan qûlanê mi ra yew qûl dî ke ma hetê xwu ra ci rê yew rehmet (wehîy û pêxambertî) dabi, ancî ma hetê xwu ra îlmêk mûsnabi ey.
66. Mûsayî ey ra va: "Seba ke ez raştî bivînî, ez bibî tabiê to çiyo ke to rê mûsnîyayo ra ti yew zanayiş mûsnenê mi?"
67. Va: "Raşta ci ti nêeşkenê mi dir sebir bikerê."
68. "Çiyo ke ti nêeşkenê [mahîyetê ci] fam bikerê ti do senî ci rê sebir bikerê?"
69. Mûsayî va: "Înşalah ti do mi wayîrê sebrî bivînê. Ez bêemrîya to zî nêkena."
70. [Qûlî] va: "Eger ti bibê tabiê mi, heta ke ez mehlûmat nêdî to, ti derheqê ê çî de mi ra pers mekere!"
71. Enê ser o rayir şiyî. Nîhayet wexto ke weniştî keştî, ey [Xizirî] keştî kerde qule. Mûsayî va: "Ti seba ke şarê xwu bixeneqnê to a kerde qule? Heqîqeten to karêk kerd ke xisara ci zaf pîl a!"
72. [Xizirî va:] "Mi to ra nêva ti nêeşkenê mi dir sebir bikerê?"
73. Mûsayî va: "Seba çiyo ke mi kerdo xwu vîr ra mi me'eybne, karê mi de mi rê zehmetî meveje."
74. Ancî rayir şiyî. Nîhayet gama ke raştê yew tutî ameyî, [Xizirî] tavilî o kişt. Mûsayî va "To yew cano pîr û pak, bêke vera yew canî de bo (bêke o kesî bikişo), to o qetil kerd ha! Heqîqeten to karêko xirab kerd!
75. [Xizirî va:] "Mi to ra nêva ti nêeşkenê mi dir sebir bikerê?"
76. Mûsayî va: "Eger tiya ra pey ez to ra çiyêk bipersî êdî mi dir hevaltî mekere. Heqîqeten hetê mi ra, ez resaya peynîya mazeretî."
77. Ancî rayir şiyî. Nîhayet resayî şarê yew dewe û înan ra nan waşt. La şarê dewe xwu nêda meymandarîya înan ver. Welhasil, uca raştê yew dêsî ameyî hema ke rijîyayêne. [Xizirî] tavilî o kerd raşt. Mûsayî va "Eke to biwaştêne helbet to vera enê de yew heq girewtêne."
78. [Xizirî] wina va: "Aha eno, aqitîyayişê mabeynê min û to yo! Nika ez do mahîyetê çiyê ke to înan rê sebir nêkerd vajî."
79. "A keştî estbî ya, a, yê feqîran bî ke xwu rê derya de xebetîyayênê. Mi waşt ez ci rê qisûrêk virazî. [Çimkî] înan dima yew padîşayo ke her keştî[ya saxleme] xesb kerdêne estbi."
80. "Eke ma bêrê tutî ser, dadî û babîyê ci kesê bawermendî bî. Enê ra ma tersayî ke [tut] înan fehşîtî û nankorî de xerq bikero."
81. [Dewam kerd va:] "Bi eno qayde ma waşt ke Rebê înan herinda ci de wa ey ra pakêr û hîna merhemetin bido."
82. "Eke ma bêrê dêsî ser, şaristan de yê di tutanê sêwiran bi; binê ci de zî yew xizînaya aîdê înan estbî; babîyê înan zî merdimêko baş bi. Rebê to waşt ke, ê her di tutî key biresê kewnê xwu wa Rebê to ra sey rehmetêk xizînaya xwu vejê. Mi eno zî xwuvero nêkerdbi. A eno yo, mahîyetê çiyê ke to derheqê înan de sebir nêkerdbi enê yê.
(…)
Türkçe karakter kullanılmayan ve büyük harflerle yazılmış yorumlar onaylanmamaktadır.