zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
12 Hezîrane 2012 Sêşeme 07:35

Ziwanê Hewnî

Esad Namdar

Wextêko derg ser ra vîyarto ke ez hewnan tena ziwanê xo de nêvînena. Kîşta ziwanê mi de çend ziwanê cîya-cîyayî zî benê meymanê hewnanê mi. Biraştî rey-rey meymanîya xo kenê xo vîr ra. Seke wayîrê keyeyî yê, wina rehet têgeyrenê. Wazenê serê di lewanê mi de bibê serdest. A game ez bena xerîbê xo, ez xo nas nêkena hindî. Serreyê mi de ne heş û ne zî mezg maneno. Ez kam a, çi kes a, ça ra ya, rîyê erdî de ez ro çi geyrena? Sey serxoşan, sey gêcan hewnanê bêhûmar û bêpeynîyan de ge fetelêna a kîşte ge zî na kîşte. Ziwanê hewnî de cuye mi rê ne merg a ne zî cuy a. Ez ne eşkena bihuyî ne zî bibermî. Tena hewnê mi mendîbî û mi xo sepernabi înan. Mi bawer kerdêne ke hewnî o ca yê ke ez eşkena cîyayî û estena xo tede bipawî. La zaf wext nêvîyart no fikrê mi zî tal vecîya. Hewnê mi zî bî sey cuya mina têroginayî, teng û tarîye. Ez hewnan de zî bîya zerrşikte û mileçewt. Mi ge bi ziwanê xo qisey kerdêne ge bi ziwanêna. Ez binê êrîşê ziwananê xerîban de menda. Û ez nêeşkaya hewnan de zî cîyayîya xo bipawî û vacî ez şima ra cîya ya. 

Baş yeno vîrê mi, ez hema qic bîya, hewnanê mi de ne kiştiş ne gonî û ne zî pêrodayîş estbi. Ez ê wextan binê asmînê aştî de embazanê xo dir mîyanê daran û vilan ra vazdayêne. Mi kay kerdêne, mi deyîrî vatêne, mi yarî kerdêne. Nê heme bi ziwanê maya mi bî. Mi bi vengê nê ziwanî şitê maya xo litibi û ez pê bibîya weye. Ez werre kena ancî bibî qic. La çi heyf ke mumkin nîyo! Merdim nêeşkeno wextî peyser bibero. Wextî ma destê xo de esîr girewtê. Yew çare yeno mi vîr la ez nêzana do bikar bêro yan nê. Eke ez cuya xo de wextêko derg bi ziwananê bînan qisey nêkerî, çend serrî dima cû ez do înan xo vîr ra bikerî. Belkî ancî bieşkî hewnan de bibî wayîrê ziwanê xo. Eke ez ê meymananê bêdawetan cuya xo ra biqewernî, do hewnanê mi ra zî biremê û ez do ancî tena ziwanê xo de hewnanê weşan bivînî. Ê ziwanê xerîbî vernî de kewtîbî zereyê cuya mi û dima ra zî xo resnabi heta hewnanê mi. Eke ziwanê hewnê mi bibîyêne do mi ra bivatêne se, ez nêzana. La ez hîs kena ke o zî sey mi xemgîn o. Seba ke pare xo ra dano ziwanêna, o zî deceno. Ez wazena ziwanê hewnî de bibî xo.*

Amed, 06.04.2012

__________

* No nuşte “Newepel, Rojnameyo kulturî yo 15 roje, Hûmare 27, Dîyarbekir, 16-30 nîsane 2012, r. 5” de weşanîyayo.

Na xebere 2819 rey wanîyaya
ŞÎROVEYÎ
karwan majeed
karwan majeed
dest xoş kak esed ... her bjit
13 Hezîrane 2012 Çarşeme 14:25