zazaki.net
28 Adare 2024 Panşeme
Girdîya Karakteran : 12 Punto 14 Punto 16 Punto 18 Punto
06 Nîsane 2012 Îne 09:56

Teyrê Hingwerî û Perperike

Can Dundar

Şima resm de çi vînenê?

Di teyrê pêkbarî, niklîktuj û renginî, ne?

Arisîyayena koçkerdişî de nîştê ra gilê darêk.

Teyro hingwer perperika ke uca ra vîyarta ra pêgureta û pêşkêşê marîya xo kerda.

Aye kî no îkramo zarîf gureto û bi afîyet eşto madeyê xo.

***

Tayê ma kî qaytê eynî resmî kerd û perperika ke niklîk de esîr kewta dîye. Bi wisarê zûrayînî xapîyaybî û vecîyaybî geşt. Emrê xo yê bi seatan sîndor kerde de na firdayena verêne bîye... Xafil de govdeyê xo de dejode zaf xirab hîs kerd. Mengeneyê nîklika ke pêgêrîyaybî de çiqas perpertîya dejê xo hende zîyade bî… Tawo ke ruh dayêne dekewte qisqacê nîklikade bîne. Cîfo peyên gulîya mîlçika ke ci rê hedîye bibî de da.

***

Tawo ke mordem hetê perperîke de nîyado, o resmo romantîk beno jû filmê îşkenceyî, ne?

Henî yo.

Kitabê serkewtena seydvanan tarîxê kederê seydan o.

Şima penceraya kamî ra cuye de nîyabidê, şima dîmensîyonê ewnîyayîşê ey ra bîyenan vînenê.

O ke matadorî rê çepikan dano piro, dejê boxeyî nêfikirîno.

O ke akvaryum û qefesî ra hes keno, xemê ey esaretê teyre û maseyî nîyo.

Naye ra kî seveknayîşê heqê boxeyo ke arena de yo, maseyo ke akvaryum de yo, teyra ke qefes de ya, perperika ke mabênê nîklike de ya, keweno vileyê înanê ke sefê seydan de ca girewto.

***

Nê verçimikêkê zehmetin ê…

Beno ke şadîya şima biremnê…

Çunke şima do her çanteyî de marê ke posteyê xo soyîyayo bivînê; her kurkî de jû samura ke qetl bîya…

Zafaneyî xalîye de nîyadanê; şima destê domanê ke a viraşta fikirênê.

Zafaneyî qotan danê xo ra; aqilê şima karkerê ke pê kemere ê xericnayê der o.

Şima goş nêdanê tarîxê bi şanî ke êno vatene, ê ke versîya efsane de mendê, şima înan meraq kenê.

Şima o ke êno goynayena ra vêşêr, o ke kuwayîş weno der eleqedar benê.

Zafer kî serwet kî hîrê şima nêbenê; Şima persa “Bi çi bedelî?” kenî.

Tawo ke şima bedel musenê, zafê şahîyan çimê şima de sey talanî asenê; zafê nutqan sey zûrî…

***

Cayo ke zafaneyî sey meydanêke îhtîşaminî vînenê de, şima daristano ke qir bîyo vînenê.

Cayo ke zafaneyî santralê termîkî yê bikarî vînenê de, şima çemo ke ameyo peysayene vînenê…

Neke çepikan, şima goş danê vengê çîkînîya ke çepikan ê bêveng kerdê.

Sultanî de ney, şima bedelê sultanîye der eleqedar benê.

Seba ke îqtîdar ra pare bicêrê îltîfatê ke ênê kerdene ney, kitabê ke îqtîdarî rê meydan wendo û ameyê arê dayene bala şima oncenê…

Nê, seba naye şadîya şima nêremena…

Şima balîşnaya wijdanî de rehet bikuyê ra, malbata girse ya mazluman de bihuzur bibê pîl.

Tawo ke şima nîya bibî pîl kî, resmê corî de şima di teyrê ke jûmînê rê cîlve kenê nê, perperika ke dej oncena vînenê…

________________

Tirkî ra çarnayîş: Ş.A.

Çime: http://gundem.milliyet.com.tr/arikusu-ile-kelebek/gundem/gundemyazardetay/05.02.2012/1498119/default.htm

Na xebere 2779 rey wanîyaya
No nuşte hema şîrove nêbîyo.