zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
27 Adare 2012 Sêşeme 10:27

Sedemê Jewnêbîyayenda Kurdan

Sînan Sutpak

Hepisxane de embazandê ma mîyan de kulturêndê rêxistinkî esto. Kamcîn embaz do kamcîn ranza de rakewo, lazim o ki embazo wezîfedar bizano û bi erêkerdena wezîfedarî ya her embaz cabibo.

Kovuşa ma de ranzayênda xewle estbî. Her embazî bi meqsedên waştê ki a ranza de rakewo. Jewî vatê “Asitimê mi esto, ganî ez nefes bigîra.” Jewê bînî vatê “Yê mi ez şewe zaf şina tever, tuwalet.” Yê bînî vatê “Faranjît mi de esto.” Yewnayî vatê “Ez nusena. Ganî cayê mi xewle bo.”

Verê verkan embaz Şîdî embazdê wezîfedarî ra vatbî “Eke no fin kovuşan mîyan de cavurnayene bibo û na ranza venge bo, ez do na ranza de xo rakewî.”

A roje roja cavurnayena embazan bî. Çend embazî kovuşa ma ra şîyê kovuşanê bînan, kovuşanê bînan ra zî çend embazî ameyî ma het.

Embazî pêro ameybî. Kîştê ra şênayî û kêfweşîya amayena embazan, kîştê ra zî cehdê cabîyayenê xo de bî, cakerdene dest kerdbî pê. Munaqeşeyê kamcîn embaz do kamcîn ranza de bimano dest kerdibî pê.

Embazê Şîdî cêr de çay şimitê. Senî ke o munaqeşe şinawit, bi tewrdê çaya xo ya ame dîyar û dekewt munaqeşeyî mîyan. Va “Xeyr o şima, embazêno?” Embazê wezîfedarî va, “Embazî qandê ke kam do kamcîn ranza de rakewo, na ranzaya xewla do ê kê bo, ser o munaqeşe kenê.”

Embazê Şîdî dest kerd bi vatene, va “Keyê şima nêveşo! Na hende xire-cira şima qandê jû ranza ya? Şima yê nêşenê jû ranza ser o pêbikerê, werê bêrê! Ma qandê çiçî ma kurdî yew nêbîyê? Qandê çiçî ma kurdan nêşayo bêrê têhet û bi eqlê selîm hereket bikerê? Çira her kesî xo anto vernî, her kesî vato mi rê? Ma nê embazê ke panc, des, vîst serrî hepisxane der ê, qandê jû ranza hende munaqeşe kenê? Ma kurdî no hal ra do senî bireyê? Qando ke ma kurdan nêşayo çîyên ser o pêbikerê û bibê jew, ma nêşayo bibîme dewlete. Qando ke ma nêbîyê dewlete, ma nêşayo mêjûya xo raşt bimusîm, qandê naye ma nêşayo…”

Embazê wezîfedarî vatena embazdê Şîdî birna û va “Embaz Şîdî. Heyranê to bena. Ti nefesê xo bîlasebeb xerc meke. Ame fehm kerdene. Xora ti nêweşê astimî yî. A ranza de ti do rakewî.” Embaz Şîdî naye ser o va, “A game munaqeşeyê xo dewam bikerî, zerarê xo çin o.”*

Hepisxaneyê Elbîstanî, 14.10.2011 

_______________

* No nuşte “Newepel, Rojnameyo kulturî yo 15 roje, Dîyarbekir 01-15 çele 2012, r. 6” de weşanîyayo.

Na xebere 1310 rey wanîyaya
No nuşte hema şîrove nêbîyo.