zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
16 Adare 2017 Panşeme 11:36

LILITH

Sedef Kandemir

Rojêk Homayî herre ra camêrdêk viraşt. Homayî ewnîya eserê xo ra. Zerrîya xo xirûrî reyde bîye pirrî. Homayî veng da heme mexlûqatê ke cenet de bî. Her kes ame û eserê hunerê Homayî rê mat mend. Nameyê eserê Homayî "Adem" bi.

Homayî vat "Tîya ra pey, gereka her kes Ademî rê hurmet bikero!" Her kesî qebûl kerd. La Îblîsî qebûl nêkerd. Homyî Îblîsî ra zaf hes kerdêne. La êdî Adem estbi…

Îblîs hêrs bi, qebûl nêkerd û vera Homayî de sere wedarit. Ê wextî ra nat kaînat de di rayirî estê: serewedaritiş û sereronayiş.

Hikayeya merdimî zî tîya ra dest pêkena.

Adem bi zerrîweşî cenet de her çî kerdêne; gêrayêne, werdêne la xo tena hîs kerdêne. Rojêk Adem şi verê Homayî. Va "Ey Homayo gird! Ez xo rê embazêk wazena. Heme çî tîya de esto û weş o. La ez eciz bena. Ez sey xo yew embaze wazena."

Homa tikê fikirîya, birre da û vat "Adem! Heqê to esto. Ez do qandê to cinîyêk bixuliqnî."

Xelatîya yewine zî tîya ra dest pêkerde. Ê wextî ra nat camerdî vanê qey cinî qandê camêrdan estê.

Homayî reyna herre ra merdimêke xuliqna û aye ra vat “Ti cinî ya! Ti Lilith a!”

Dima Lilith û Adem ameyî têhet. Înan yewbînan ra zaf hes kerd. La game bi game Adem vurîyayêne. Lilith cinîyeka aktîfe û jîhate bî. La Ademî qebûl nêkerdêne tim û tim vatêne "Ti qandê mi esta ganî ti xizmetê mi bikerê, ez çi wazena ti winî bikerê." La Lilith xizmetkare nêbî. Aye zanayêne ke a zî sey Ademî herre ra ya. Lilithe hereketê Ademî qebûl nêkerd û sere wedarit. Îblîsî ra nat di rayirî estbî. Lilith zî hetê Îblîsî tercîh kerd û rema. Homayî zî Lilithe lanetî îlan kerde.

Rojî vîyartî. Ademî bêrîya Lilithe kerdêne û xemgîn bîyêne. Homa zî qandê Ademî xemgîn bi. Homa tikê fikirîya û reyna birre da. Homayî do reyna cinîyêk bixuliqnayêne. Cinîyêka îtaetkare…

Homayî cinîyêk xuliqna, esteyê parsûya Ademî ra Hewa xelq kerde. Hewa sey Ademî nêbî. Hewa sey Ademî herre ra nêbî. Hewa este ra amebi xuliqnayiş. Seke Adem maya Hewa bo. Çimkî a roje ra pey cinîyan do merdimî biardêne dinya.

Hewa qandê Ademî ameybî xuliqnayiş…

Hewa îtaetkare bî, xizmetê Ademî kerdêne. Di rayirî estbî. Hewa rayirê sereronayişî weçînabi.

Û Ademî caran Lilithe xo vîr ra nêkerde. Hewa zî…

Êdî kam ke sere wedaro, o beno Îblîs! La kes nêzano ke Îblîs çîyêko xirab nîyo. Îblîsî neheqî rê sere wedarito. Lilithe zî Îblîs a.

Ma zî Hewa nîyê, ma ruhê Lilith ra yê!

__________

Not-1: Nuştişê nê nuşteyî de mi kitabê "Zingsem, Vera. Lilith. Çev., Devrim Doğan Yüzer, İlya Yayınevi, İzmir, 2007" ra îstîfade kerd.

Not-2: Eno nuşte "Newepel, hûmare 96, r. 6" de weşanîyayo. Bê destûrê nuştoxe û rojnameyê Newepelî yewna ca de weşanayiş qedexe yo.

Na xebere 828 rey wanîyaya
No nuşte hema şîrove nêbîyo.