zazaki.net
21 Tebaxe 2017 Dişeme
Girdîya Karakteran : 12 Punto 14 Punto 16 Punto 18 Punto
09 Sibate 2013 Şeme 02:38

Bi Îngilizkî Kirmanckî Ser o Yewna Kitab

Amadekara kitabî Doç. Dr. Gülşat Aygen, beşê îngilizkî yê Unîversîteya Northern Illinois de mamosta ya û ziwannasîye ser o dersan dana.

Kirmanckî ser o bi îngilizkî yewna kitab amade bi. Nameyê kitabî “Zazaki/Kirmanckî Kurdish” (Kurdkîya Zazakî/Kirmanckî)  yo, hetê Gulşat Aygen ra amade bîyo û 2010 de Munchen de weşanîyayo.

Kitab bi kilmîye derheqê gramerê kirmanckî de yo, hîna zaf awanîya fonetîk, fonololîk, morfolojîk û sentaksê kirmanckî ser o ameyo vindertene.

Kitab çar qisman ra yeno pê. Qismê verênî de xususîyetê fonolojîkî, qismê diyin de xususîyetê morfolojîkî, qismê hîrêyin de sentaksê kirmanckî ser o ameyo vindertene. Qismê çarin de zî metnê nimûneyî estê.

Amadekara kitabî Doç. Dr. Gülşat Aygen, Dewletanê Yewbîyayan yê Amerîka de beşê îngilizkî yê Unîversîteya Northern Illinois de mamosta ya û ziwannasîye ser o dersan dana.

Doç. Dr. Gülşat Aygen, 1960 de Îslahîye de ameya dinya, la pîyê aye Besnî ra yo. 1996 de Fakulteya Edebîyat û Ziwananê Rojawanî yê Unîversîteya Bogazîçî ra mezun bîya, serra 1998 de eynî unîversîte de warê ziwannasîye de lîsansê berz temam kerdo. 2002 de Unîversîteya Harvardî de warê îlmê ziwanî yê teorîkî de doktoraya xo temam kerda. Nika Unîversîteya Illinois û Unîversîteya Harvardî de dersa teorîyê îlmê ziwanî, muqayesekerdişê ziwanan û dersê ziwanî yê îngilizkî dana. Warê îlmê ziwanî de bi seyan meqaleyê aye weşanîyayê. Nê kitabî ra ver, serra 2007 de zî derheqê gramerê kurdkîya kurmanckî de yew kitabê gramerî weşanayo.

Derheqê amadekerdişê nê her di kitaban de vana: “Ez bi heyret temaşe kena ke akademîsyenê ke unîversîteyanê Tirkîya de xebitînê sedemanê polîtîkan ra wayîrîya ziwanê miletanê bindestan nêkenê. Mi ke ewnîya derûdorê akademîkî yê Rojawanî de zî kes çîyêko cidî nêkeno, mi qerar da ke no wezîfe keweno mi ser. Na xebate mi rê bîye meselaya rûmetî.”

Gülşat Aygen, Zazaki/Kirmanckî Kurdish, Lincom Europa, Munchen, 2010, 93 r.

Na xebere 2816 rey wanîyaya
No nuşte hema şîrove nêbîyo.