Şêx Seîd û Embazê Ey Ameyî Yadkerdiş

Roja 29.06.2009, seba yadkerdişê serrgêra şehadetê Şêx Seîd Efendî û embazanê ey, verê Camiya Girde (Ulucamii) de yew programê yadkeriş virazîya.

Program heta Komisyonê Heqanê Merdiman yê TEVKURD'î ra ame viraştış û pankartê “Em serok û têkoşerên Kurdistanê ji bîr nakin” abi.

Destpêkê programê yadkerdişî de verî cû vindertişê îhtîramî virazîya, badê zî ruhê şehidan rê fatîha wanîya.

Sidqi Zîlanî beyenatê çapemenîye bi kurdkîya zazakî wend û wina va:

"Ewro (29.06.2009) bi amancê yadkerdişê serrgêra şehadetê Şêx Seîd Efendî û embazanê ey ê doze ke netîceyê şerêkê arasteyê înan amebi kerdiş de hetê dadgehêka neheq û nemeşrûye ra cezayê dardekerdişî ro înan amebi birnayîş, ma tîya yê.

Na bîyene, eynî wext de mîladê înkarîya rastîyê miletê kurdî û cografyaya Kurdîstanî teşkîl kena. Ma kurdî vera sîyasetê înkar, asîmîlasyon, qetlîam û çinkerdişî de, ma tarîxê xo, aîdîyetê xo û şehîdanê xo, xo vîrî ra nêkerdê û ma do nêkerin.

Heqo tewr tebîî yo ke şaro kurd erdê xo yê qedîmî ser o bibo wayîrê îqtîdarê sîyasî û îstîqbalê xo bi destê xo tayîn bikero. Ma nê heqî tu kesî reyde nêkenê babeta munaqeşeyî.

Edaletê îlahî, huqûqê gerdûnî, wijdan û rûmetê însanîyetî zî naye ferman kenê. Bi na wesîle, eke meqsedê vatişê merdimanê dewleta tirke “firsendo tarîxî” ra çareserî û nîyeto hol bo, ganî gamê aver astengê ke vernîyê azadîya şarê kurdî de yê bîyerê rakerdiş, rastîya miletbîyena kurdan û cografyaya Kurdîstanî ser o heqê îqtîdarê sîyasî û selahîyetê xoîdarekerdişî qebûl bibo.

Gama verêne yê na yewe, ganî neaşê Şêx Seîd Efendî û embazanê ey ê ezîzan teslîmê keyeyê înan bîyerê kerdiş, hewna, neaşê pîrozî yê Seîdê Kurdî û Seyîd Rizayî ke eynî aqibet ro înan zî bîyo, teslîmê keyeyê înan bîyerê kerdiş û şarê kurdî û keyeyê înan ra ozr bîyero waştiş.

Wa ruhê şehîdanê Kurdîstanî şad bo."