Şaşnuştiş Zerar Dano Kirdkî!

Sloganê Afîşe de:

MA VÎRA NIKERD O – MA VÎRA NIKEN Ê

ME JI BÎR NEKIR – EM JI BÎR NAKIN

UNUTMADIK – UNUTMAYACAĞIZ

* * *

Seke aseno, sloganê na afîşe bi her di lehçeyanê kurdkî yê Kurdîstanê Bakûrî, yanî bi kirdkî û kirdaskî û bi tirkî nusîyayo. Rastî zî na ya ke heme fealîyetanê neteweyî yê kurdanê Kurdîstanê Bakûrî de her di lehçeyî seyyewbînan bêrê şuxulnayene. Û xora, beno ke qismêk kurdî bi kurdkî nêzanê, coka normal o ke tayê çî bi tirkî zî bêrê nuştene.  

Nê serranê peyênan de, yanî par û emser, zaf kêmî bo zî, sey nê sloganî merdim vîneno ke tayê cayan de bere-bere kirdkî zî hetê dezgeyanê kurdan ra yena şuxulnayene. Seba lehçeya kirdkî (kirmanckî, zazakî, dimilkî) no averşîyayîşêko musbet o.

Helbet nuştişê kirdkî karêko hol o, keyfê merdimî ano. La bi o şerto ke rast bêro nuştene. Çunkî gama ke şaş bêro nuştene, kar ra vêşêr zerarê xo lehçe rê esto. Yanî, gurenayîş û nuştişê lehçe hol o, karêko baş o, ganî ma piştgirîye bikin. Labelê seba ke şaşnuştiş zerar dano kirdkî, coka ganî ma qebul nêkin.

Meseleya rastnuştişî de wezîfe keweno milê kirdan ser. Çunkî kirdasî bi xo kirdkî nênusenê, nêzanê binusî. Xebatêka winasî de mehqeq bi yew kirdî danê nuştene. Coka kirdê ke nê karan kenê, ganî yan rastnuştişê kirdkî bimusê yan zî kesêkê zanayeyî ra bipersê.

Ma hewna biewnin nuştişê sloganê na afîşe ra.

Hetê rastnuştişî ra tirkî de problem çin o. Tirkî rast nusîyaya.

Kirdaskî zî rast nusîyaya. Hem hetê rastnuştişî ra hem zî hetê tercumeyî ra problem tede çin o.

Labelê kirdkî hem hetê tercumeyî ra hem hetê rastnuştişî ra şaş nusîyaya.

Hetê tercumeyî ra karê îbareyê verênî de şaşî esta. Tercumeyê karê “NEKIR” yê kirdaskî “NÊKERDO”yo ney “NÊKERD” o. Çunke karê “NÊKERDO” yê kirdkî teqabulê “NEKIRIYE”yê kirdaskî û “UNUTMAMIŞIZ”ê tirkî keno.

Hetê rastnuştişî ra zî ganî wina binusîyayêne:

MA XO VÎRÎ RA NÊKERD – MA XO VÎRÎ RA NÊKENÊ

Ez hêvîdar a kesê ke fealîyetanê xo de kirdkî şuxulnenê, yan ê bi xo rastnuştişî bimusê û kirdkî rast binusî yan zî merdimanê zanayan ra bipersê. Nê her di alternatîfî zî mumkin ê.