Rojnameyê Kirmanckî (Zazakî) Vejîyeno

Yew rojnameyo kulturî yo pancês roje ke tena bi kirmanckî (kirdkî, zazakî, dimilkî) weşanîyeno, nêzdîye ra do vejîyo.

Rojname bi nameyê NewePel çarçewaya xebata Komela Ziwan Huner û Kulturî Ziwan-Komî de vejîyeno û merkezê ey Dîyarbekir o.

Destpêk de do pancês rojan ra reyê vejîyo û heşt rîpelî bo. Dima do hem rîpelanê xo bizêdno hem zî hewte ra reyê vejîyo.

Rojnameyê NewePelî roja 15 adare 2011 de hûmara xo ya verêne weşaneno. Goreyê malumatanê ke berpirsîyaranê komela Ziwan-Komî danê, rojname do hîna vêşî bi destan vila bibo û hetanî ke mumkin o heme nehîye, qeza û şaristananê ke tede kirmanckî qisey bena de vila bibo.

Kesê ke wazenê bibê temsîlkar, vilakar û aboneyê rojnameyî, hewna kesê ke wazenê nuşte, mesaj û pêşnîyazanê xo biresnê rojnameyî, şênê adresa [email protected] rê binusê û têkilîya xo saz bikerê.