Qazaxîstan de Seba Namzedîye Îmtîhanê Qazaxkî

Qazaxîstan de seba ke vernamzedêkê serekkomarîye nêşêna îmtîhanê ziwanî yê qazaxkî ra bivîyaro, nêşa bibo namzedê serekkomarîye.

Qazaxîstan de seba newekerdişê serekkomarîye roja 23 nîsane 2011 de weçînayîş virazîyêno. Goreyê malumatanê ke komîteya merkezî ya weçînayîşî dana hetanî nika hîrê merdiman seba namzedîya serekkomarîye muracat kerdo. La nînan ra Ualikhan Kaisarov seba ke nêşayo îmtîhanê ziwanî yê qazaxkî ra bivîyaro namzedîya ey nêameya qebul kerdene.

Ualikhan Kaisarov vano, ez qazaxkî hol zana, mi rê neheqîye ameye kerdene. La komîteya merkezî ya weçînayîşî îmtîhankerdişê ziwanî de qet tawîz nêdana.

Seke aseno, welatanê şarî de, seba ke merdim bibo namzedê îdarekerîye, ganî ziwanê miletê xo hol bizano.