Perwerdeyê Kurdîstanê Başûrî Destê Tirkan de yo

Şirketê Fezalar yê perwerdeyî ke yê cematê Fetulah Gulenî yo û Kurdîstanê Başûrî de fealîyet keno, seba ke Helebçe de kolejêk akero wezîrê perwerdeyî yê Kurdîstanê Başûrî reyde peymanêk îmza kerde.

Roja 23 tebaxe 2010 de, mudîrê şîrketê Fezalar yê perwerdeyî Talip Büyük û wezîrê perwerdeyî yê Kurdîstanê Başûrî Sefîn Dizeyî seba ke Helebçe de kolejêk virazîyo peymane îmza kerde.

Kolejê cematê Fetulah Gulenî de do wendiş bêpere bo û perwerde bi kurdkî, îngilîzkî, tirkî û erebkî bo. Merasîmê îmzakerdişê peymane de wezîrê perwerdeyî Sefîn Dizeyî şîrketê Fezalar yê cematê Fetulah Gulenî pîroz kerd û va, “Wendekarê ke wendegehanê şîrketê Fezalar ra mezûn benê, sewîyeyê perwerdeyê înan gelek berz a.”

Kolejo ke Helebçe de virazîyeno, do destpêkê serra 2011î de bikewo fealîyet. Meaşê dersdaranê ke nê kolejî de derse danê do hetê hukmatê Kurdîstanê başûrî ra bêro dayene.

Serra 1994 ra nat cematê Fetulah Gulenî Kurdîstanê Başûrî de şuxulîyeno û hetanî nika 19 wendegehî hetê nê cematî ra ameyê akerdene û nika fealîyet de yê. Bi no qayde perwerdeyê Kurdîstanê Haşûrî êdî giranîya xo destê cematê fetulah Gulenî de yo.