Nêweşxaneyanê Dîyarbekirî de Kursê Kurdkî

Dîyarbekir de, nêweşxaneyanê dewlete de kursê kurdkî (kirdkî û kirdaskî) roja 17.03.2014 de dest pêkerd û her nêweşxane de, di aşmî kirdkî di aşmî kurmanckî, do çar aşmî dewam bikero. Kursê her lehçe çar hewteyanê verênan de dersa teorîkî, çar hewteyanê peyênan de zî dîyalogan ser o dersa pratîkî dîyena.

Her nêweşxane de hewte de di rojî kurs dîyeno. Nêweşxaneyê Tutan de rojanê dişeme û çarşeme, Nêweşxaneyê Perwerde û Cigêrayîşî de rojanê sêşeme û panşeme, Nêweşxaneyê Doxumî de zî rojanê dişeme û îne kurs dîyeno. Merheleyê verên de Nêweşxaneyê Tutan û Nêweşxaneyê Perwerde û Cigêrayîşî de kursê kirdkî dîyeno, Nêweşxaneyê Doxumî de kursê kurmanckî dîyeno. Merheleyê diyin de na rey do Nêweşxaneyê Tutan û Nêweşxaneyê Perwerde û Cigêrayîşî de kursê kirdkaskî, Nêweşxaneyê Doxumî de kursê kirdkî bidîyo.

Nêweşxaneyê Tutan de da-vîst, Nêweşxaneyê Perwerde û Cigêrayîşî û Nêweşxaneyê Doxumî de zî her yewî de da-çewres kursîyerî beşdarê kursî benê. Zafê înan doktor, hemşîre û îdarekarê nêweşxaneyan ê. Mîyanê kursîyeran de kurdî (kurmanc û kirdî) û tirkî pîya estê. Qismêkê kurdan kurdkî (kirdkî û kurmanckî) zanê la zêde fehm nêkenê, wendiş û nuştişê kurdkî zî nêzanê. Coka kurs de ziwan sifir ra yeno musnayîş. Kursê kirdkî Roşan Lezgîn dano, kursê kurmanckî zî Serfiraz Koymen dano.