Konferansê Kirdkî Çewlîg de Virazîya

Konferansê kirdkî ke hetê TZP-Kurdî ra organîze bi, rojanê 30 hezîrane-01 temmuze 2012 de Çewlîg de virazîya.

Seba ke nê peynîyan de nameyê “xebata gramerî” ser o gramatîkê kirdkî yeno xeripnayene coka konferans de rewşa kirdkî yan zî ameyeyê kirdkî ra vêşêr qaydeyê gramerê kirdkî munaqeşe bîyî. 

Konferans şarî rê akerde bi la hîna zaf kesê ke cayanê cîya-cîyayan ra sey meyman amebî wesênayîş beşdar bîyî.   

Çewlîg de na reya pancin a ke konferans û panelê safî bi kirdkî organîze benê. Reya verêne roja 27.05.2006 de hetê Navenda Çanda Çewlîgî ra yew panel, reya diyine roja 12.04.2009 de hetê komela Bîn-Derî ra yew konferans, reya hîrêyine roja 02.04.2011 de hetê Nubihar û Vateyî ra yew konferans û reya çarine zî roja 07.04.2012 de hetê Bîn-Der û Firat-Derî ra yew konferans amebi organîze kerdene.

Na gamêka muhîm a ke TZP-Kurdî eleqe nîşanê kirdkî dana û reya verêne aktîvîteyêka winasî organîze kena. Ma hêvîdar ê ke nê konferansî ra pey awanîya çekuyanê kirdkî û bitaybetî zî qaydeyê gramatîkê kirdkî êdî nêrê xeripnayîş. Ma zî psîkolojîyê terefdarîye û hîsanê reaksîyonelan dûrî, bi eqlêko îlmî û muşterek, pêro pîya dest bidîn yewbînan û kirdkî rê xizmetêko raşt bikîn.