Kokimê Dîyarbekirî Tirêze Kaykenê

Dîyarbekir de kayê dameyî zaf menşûr o. Hema vajêne ke Dîyarbekir û dorûverê ey de her camêrd zano dame kay bikero. Dame bi 32 kerran yeno kay kerdene, her kaykerdox 16 kerrayê xo estê.

Dame zî yew çeşîdê setrencî yo la qasê setrencî têmîyanek nîyo, bineyna sade yo. Heta ke tayê miletî seba dameyî vanê “setrencê kurdan”. Feqet kayê tirêze (newekî) sadetir o. Nê kayî rê tena zekayêka sivike lazim a.

Labelê kayê tirêze (newekî) zî qasê dameyî menşûr o. Dîyarbekir de zafê kokiman, bitaybetî kirdê şarê koyan tirêze kay kenê. Çunke tirêze kayêko hîna pratîk o, zaf derg nêrameno.

Kokimê kirdî yê Dîyarbekirî badê nimajê êreyî parkan de yenê têhet û hetanî nêzdîyê şanî, tirêze kay kenê. Bi no qayde hem xem û xeyalan ra kewenê dûrî hem zî mezgê înan zinde maneno.