HÛMARA 12. YA ŞEWÇILA VEJÎYA

Hûmara diwêsine ya kovara edebî hunerî Şewçila bi muhtewayêka dewlemende vejîya.

Na hûmare de nuşteyêko muhîm derheqê eseran û cuya nuştoxê tewr verên yê kirdkî Ehmedê Xasî de yo. Nuşteyo ke hetê Roşan Lezgînî ra amade bîyo de belgeyan reyde bidetay behsê eseran û cuya Ehmedê Xasî beno.

Na hûmare de di versîyonê eserêkê zaf muhîmî yê edebîyatê kurdan destanê Zembîlfiroş û Gulxatûne weşanîyayê. Versîyonê verên hetê Mihanî Licokicî ra nusîyayo û 253 beytan ra yeno pê. No eser wina dest pêkeno:

Ey meclisa bi zewq û xoş

Suhbet beno, bide ci goş

          Tera bigî feydewo boş

          Kena behsê Zembîlfiroş

Versîyonê diyin zî hetê Hemîd Hozanî ra nusîyayo. Nê versîyonî de zî 47 çaraneyî estê. Versîyonê Hemîd Hozanî wina dest pêkeno:

Ey dil ti bê ancî bicoş

Reyêke cam ra mey binoş

Ma vaj qiseyê Zembîlroş

Wa bişnawê hîkayetî

Şîîra Mehdî Özsoy “Gerreyê Feqîrî” zî sey yew eserê edebîyatê ma yê klasîkî na hûmare de weşanîyaya.

Na hûmare de eserê cinîyanê edîban zî gelêk estê. Hêlîn Anter yew hîkayeya kilmeke nuşta. Hacer Petekkaya, Şermîn Kanhan û Necîbe Kirmizigul her yewe yew şîîre nuşta. Ancî Şeyda Asmîn û Necîbe Kirmizigul her yewe yew hîkaye nuşta. Uzlem Akan zî kitabê hîkayeyan “Tarîyîya Adirî de” analîz kerdo.

Na hûmare de Bîlal Zîlan, Hesen Şêr û Newzat Valêrî şîîrî nuştê. Ancî Adir Dêrsimijî yew hîkaye nuşta. Yew hîkaye zî yê Firat Cewerî ya ke kurmanckî ra tercumeyê kirdkî bîya û nuştoxê hîkaye dîyayo şinasnayene.