Fîlmê “5 Nolu Cezaevi: 1980-84” reyna xelate girewte

Fîlmê belgeyî “5 No’lu Cezaevi: 1980-84” festîvalê 21. yê fîlman yê mîyanneteweyî yê Anqara de qismê fîlmanê belgeyî yê profesyonelan de xelata yewine girewte.

Nê fîlmî par zî festîvalê 46. yê portakala zerrnêne yê fîlman yê mîyanneteweyî yê Antalya de xelata fîlmê tewr holî yê belgeyî girewtbî.

Fîlmê belgeyî “5 No’lu Cezaevi: 1980-84” ke rejîsorî ey Çayan Demirel o, badê cûntaya 12 êlule 1980 îşkenceyê ke zindanê Dîyarbekirî de ro kurdan bîyê behs keno.

Tarîxê însanîyetî de û bitaybetî tarîxê kurdan de zindanê Dîyarbekirî wehşetanê tewr girdan ra yew o. Cûntaya faşîst û nîjadpereste yê 12 êlula 1980 bi kerdenanê wehşîyanê sîstematîkan waşt ke kurdîtîye zindanê Dîyarbekirî de biqedîno.

Kesê ke zindan de no sosret ame bi sereyê înan zî tede, çîyo ke zindanê Dîyarbekirî de qewimîya, esas hîna zî hetê kurdan ra tam fehm nêbîyo. Zindanê Dîyarbekirî de amanc qedênayîşê mefhumê kurdîtîye bi, bi hawayêkê wehşîyane çinkerdişê kurdbîyene bi. No fîlm tena hetêk ra bineyke wehşetê Dîyarbekirî nawneno.

Rejîsorê fîlmî Çayan Demirelî verê cû zî bi nameyê “Dêrsim-38” fîlmêkê belgeyî Dêrsimî ser o viraştbi.