Dîyarbekir de Amadekarîya Kovarêka Newîye ya Kirmanckî (Zazakî)

Amadekarîya vetişê kovarêka kirmanckî (zazakî) ya edebî-hunerî yeno kerdene. Kovara kirmanckî ya edebî-hunerî ke Dîyarbekir de amadekarîya aye yeno kerdene do tena eseranê estetîkan biweşano.

Berpirsîyaranê kovara newîye derheqê vetişê kovare de wina malumat da: “Êdî o wext ameyo ke kirmanckî de kovarê ke tena yew biranş de weşanîyênê vejîyê. Nîyet û amancê ma yo bingehîn o yo ke edebîyat û hunerê kirmanckî (kirdkî, zazakî, dimilkî) de pencerayêka newîye akerîn û kirmanckî gamêna aver biberîn.”

Berpirsîyaran derheqê çarçewaya weşane ya kovare de zî wina va: “Kovara ma wazena çarçewaya edebîyat û hunerî de weşana xo bikero. Û tena eseranê estetîkan yê sey şîîre, hîkaye, roman, meqale û nuşteyanê derheqê teorîya edebîyat û hunerê modernî de, hewna, roportaj û krîtîkanê (rexne) eseranê edebî û hunerî biweşano.”

Amadekarê kovare derheqê şuxulnayîşê alfabe û qaydeyanê rastnuştişî de zî vanê: “Nuştiş û redaktekerdiş de ma do qaydeyanê rastnuştişî ke hetê Grûba Xebate ya Vateyî ra tesbît bîyê tetbîq bikerîn.”

Amadekaranê kovare xo rê kerdo amanc ke nuştoxan û wendoxanê neweyan rê bibê sey wendegehêk û heme heskerdoxanê edebîyatê kirmanckî rê bibê platformêk. Nê derheqî de wina vanê: “Ma zanê ke averşîyayîşê edebîyat û hunerî de, perwerdebîyayîşê nuştox û hunermendanê neweyan de, xuliqîyayîşê eseranê estetîkan de, munaqeşekerdişê fikr û teorîya esetetîkî de kovarî her wext sey wendegehî bîyê. Coka ma zî hêvîdar ê ke sey pelêkê tern û tezeyî seba edîb, nuştox, hunermend û heskerdoxanê edebîyat û hunerê kirmanckî nê wareyan de bibîn platformêk.”

Amadekarê kovara newîye derheqê eleqeyê wendoxan de bihêvî yê û bawer kenê ke do kovare eleqeyêko baş bivîno. Nê derheqî de zî vanê: “Hetanî ke destê ma ra bêro ma do layîqê wendoxanê xo bîn. Û ma hêvîdar ê ke wendoxê ma zî bi eseranê xo, bi mektuban, rexne û pêşnîyazanê xo piştgirîya ma bikerîn. Hîna zaf zî, kovare sey kovara xo bizanîn û her hetan ra wayîrîye bikerîn.”