Dêrsim de Kursê Kirmanckî (Zazakî)

Kurdî-Dera Dêrsimî seba kursê kirmanckî dest bi qeydkerdişê kursîyeran kerd.

Goreyê malumatanê ke ANF dana, komela Kurdî-Derî ke di mengî verê cû Dêrsim de abîye, dest bi kursê kurdkî kena. Karbidestanê Kurdî-Derî ra Ezîz Avinî derheqê na babete de va, “Şarê Dêrsimî wazeno wayîrîye ro ziwan û kulturê xo bikero. Her emr ra gelek merdiman seba kursê kirmanckî muracat kerd.”

Karbidestê Kurdî-Derî Ezîz Avinî va, “Badê dewreyê verênî yê kursî ma do seba amadekerdişê dersdaran xebata atolye bidîn dest pêkerdene.” Ezîz Avinî va, “Şaristananê kurdan ra o ke tewr zêde asîmîlasyonî tede kar kerdo Dêrsim o. Labelê şarî na yewe ferq kerda coka êdî wayîrîye ro ziwanê xo keno.”

Ezîz Avinî va, “Nêzdîye ra ma do lehçeya kurmanckî de zî dest bi kursî bikerîn. Ma wazenê Dêrsim de her di lehçeyanê kurdkî de kurs bidîn.”