zazaki.net
21 Tebaxe 2017 Dişeme

Murad Canşad / Nuştox

DOO!

06 Tebaxe 2013 Sêşeme 20:03

Yew lajek verê apartmanêk de xo rê ca bellî keno, her roje siba rew ra şono uca de do roşeno. Cayê xo serê rayîrî yo, ameyîş-şîyayîşê xo derya yo. Dorûver cayê awanîyan o ke hîna zêde karkerê awanîyan şonê yenê. Germê hamnanî de karê awanî zî zehmet o. Merdim kefsatîye ver ra qir beno. A kefsatîye de oyo ke şuşeyêk doyo serdin meşimo kam o!

Karê lajekî baş o! Verê apartmanî de keno qîr-qîre:

“Doo! Doo! Doyo serdiin!”

Apartman ra yew mêrik ecîz beno. Pencera akeno, vajîyeno lajekî de:

“Lawo to çi goş û kerikê ma berdî! Vîndî bibe şo, reyna vengê to meyero goşê mi!”

Mêrik gef-gur keno ser la destê lajekî caran qezencê weşî ra beno! Ters û xof wa bibo zî roja bîne ancî yeno cayê xo, ancî keno qîr-qîre.

Mêrik rojêk xo nêgeno, apatman ra yeno war, lajekî kuweno. Do û şuşeyan ver de beno zur-zura lajekî, lay û laser bermeno, hesiran keno war.

Yewero kekoyo kulxanbeg uca ro derbas beno, hal-hewalê lajekî vîneno. Şono ver, ci ra perseno:

“Lila se bîyo ti bermenî?”

Lajek hesiranê çiman estereno, hebêk beno aşt, hal-meseleyê xo û mêrikê apartmanî vano. Kekoyo kulxanbeg hêrs beno, ca de didanan qirçneno, verê xo çarneno penceraya mêrikê apartmanî. Çiqas ke destber ame, qîreno:

“Dooo! Dooo! De biye ero, de biye war haa! Doo! Doo!”

__________

* No nuşte "Newepel, Rojnameyo kulturî yo 15 roje, Hûmare 35, Dîyarbekir 16-31 Temuze 2012, r. 4" de weşanîyayo.

No nuşte 349 rey wanîyayo
No nuşte hema şîrove nêbîyo.