Murad Canşad / Nuştox

Di mêşnayê/mîyê ma estê. Ma nê di mêşnayanê xo ra yewere danê yew cinîye, yewere danê yew camêrdî.

Cinike mêşnaya xo se kena?

Doşena, ci ra şit gêna.

Şitê xo amên kena, ci ra mast û xavike/helîm gêna.

Mastê xo parzun kena, ci ra mastê pêlekî gêna.

Mastê xo kena meşke şanena/nîrena, ci ra rûn û do gêna.

Doyê xo dana adirî ser girênena, ci ra toraq/tantur gêna.

Mastê xo kena zereyê postikî, ge-ge masto teze ge-ge do kena ser nesilnena, ci ra payîzdo/payîzonek virazena.

Mastê xo amên kena, ci ra penîr virazena. Penîrê xo helênena ci ra penîro helênaye; munena, ci ra penîro munite virazena. Vaş kena penîrê xo ver, ci ra sîrik virazena.

Penîrê xo hurdî kena, mast kena ser; ci ra tomast virazena.

Şijîya penîrê xo dana adirî ser girênena, ci ra lor/lorik virazena.

Toraqê xo elawena, gude kena dana tîja hamnanî ver; ci ra terne/çortan virazena.

Mêşnaya xo ke zaye; gocê ci girênena, ci ra heriş virazena…

Mi hende ard pêser, çend çîyan zî xeyrê xo şima bivajê.

Sewbîna se kena?

Mêşnaya xo perzena/qesnena, ci ra pirç/peşmî gêna.

Pirçê xo şuwena şane kena, ci ra lihêf, doşek, balişna, kulav virazena.

Pirçê xo yê şanekerdeyî bi rêşta/rêstike rêsena, ci ra rês virazena. Vilikanê yabanî arê dana girênena, rêsê xo kena ci, kena renga-reng.

Rêsê xo yê renga-rengî ra gore, puç/kurik, lepik, şapik, şala mîyaneyî, cacim, ciwal, heqibe virazena.

Mi hende ard pêser, çend çîyan zî xeyrê xo şima bivajê.

Sewbîna se kena?

Mêşnaya xo weyî kena, a ci rê verekan ana; bena wayîra verekan, kaviran, berendîran, hogeçan, vosnan, berananê mazan û mêşnayan. Bena wayîra selxan û pesan.

Mi hende ard pêser, çend çîyan zî xeyrê xo şima bivajê.

Ya, cinîye nê heme çîyan kena.

Ma camêrd mêşnaya destê xo se keno?

Sere birneno weno!

____________

* No nuşte "Newepel, Rojnameyo kulturî yo 15 roje, Hûmare 33, Dîyarbekir 16-31 Temuze 2012, r. 6" de weşanîyayo.