zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
13 Gulane 2011 Îne 22:37

Xebata Erjaya

Mistefa Şahîn

Gelo verê verkan ra hetanî ewro nê hardî ser o çend împaratorî û çend dewletî ronîyay û raşîyay. Çend bacarî xerabe bîy û çend layî bîy ziwa. Çend dar û daristanî veşay, çend gulîstanî çilmisîyay. La hîna zî ziwanê ma yo bêdewlet, bêperwerde hardê xo ser o yo. Ma eceman, ereban, roman, farisan û tirkan ver sereyê xo nêtewêna. Bi nê ziwanê weşî şîîrî, hîkayeyî û romanî amey nuştiş. Zaf şikir hardê ma bî kewe, daranê ma vilî akerdî. Çimke ziwanê ma bîyo ziwanê nuştişî.

Seba ke ziwanê ma kirmanckî merg ra xelisîyayo, ez zerrweş û hêvîdar a. Zerrwêşîya mi xoverrodayîşê şarî ra yeno. Şar, xo û ziwanê xo rê wayîr vecîyeno. Verî ra, se serrî yo ke ziwanê ma qedexe yo.

Ewro kurdkîya ma ra kirmanckî zî ver bi weşîye şina. Kirmanckî zî sey kurmanckî lehçeyêka nuştekî ya. Nuşteyê rindî bi ked û xebate xurt benê. Nuştoxê ma zî veng nêvindenê, ziwanê xo ser o xebitîyenê. Xebata ziwan û edebîyatê ma roje bi roje raver şina û weş bena. Çimke qaydeyê rastnuştişî û formê standardê çekuyan cayê xo giroto. Ferhengî amede bîyê. Nuşteyî pêro bi formê nê çekuyanê muşterekan nusîyenê. Se berheman ra zêdeyêr goreyê qaydeyê rastnuştişî û formê standardî yê çekuyan amade bîyê. Ma nê nuştoxan pêrinê rê sipas kenê, destê înan weş û keyeyê înan awan bo.

Grûba Xebate ya Vateyî ke standardîzekerdişê kirdkî ser o 1996 ra nat xebîtêna, kombîyayişê xo yo peyîn zî rojanê 21-24.05.2011 de Dîyarbekir de viraşt. Ziwanê ma xebata înan ra pay ra yo.

Mabênê komxebatan û şarî bi têkilîya sîyasetî mumkin a. Ez kemasîyêk tîya de vînena. Grûba Xebate ya Vateyî çend destbere ra yeno, hendêk sîyaset ra dûr vindena. Ez o tewir zana. Komxebata ziwan û edebîyatî bî. La şarê kurd, ewro zêde ra polîtîze bîyo.

Gelo şarê ma Grûba Xebate ya Vateyî rê mumkin bi, bi têkilîya tîcarî xo biresnê yewbînan. Ma vajîn ke bi reklaman. Merdim hetê tîcarî de kemasîyêk nêvîneno.

Cayê ziwan û edebîyatî wendegeh ê. Şarê ma û Grûba Xebate ya Vateyî tîya de zî nêşîkey bêrê tehêt. Çimke ziwanê kurdî wendegehan de heta keyan de zî qedexe bi.

Grûba Xebate ya Vateyî xo ver ro da, xebîtîya. La na xebata erjaya mabênê çend kesanê ziwannasanê kirmancan de mende. Çend wendoxê hesasî zî na xebata înan taqîb kerde. Înanê ke wend zî zaf çî te ra fehm nêkerd. Çimke musnayene rî bi rî bena. Musnayene hetê mamostayan ra cayo azad de virazîyena.

Hewce keno kêmasîyê şarê xo zî binusî. Şarê ma na xebate de ca nêgirot, fikr û rexneyê xo qisey nêkerd, nênuşt. Şar na xebate ra herey haydar bi, la ewro zî eleqeyê xo kemî yo. Wexto ke têkilî tay bo, şar senî ziwanê xo yê nuştekî bişinasno? Ziwanê xo senî raver bêro, xurt bikero û bi ziwanê xo senî şa bibo?

Barê Grûba Xebate ya Vateyî zî giran bi. Înan seba ziwanê xo zaf fedekarîye kerde, la şarê ma û roşnvîranê ma nêkerd. Kurdkîya ma heme cayanê dinya de vila bî. Ziwannasê Grûba Xebate ya Vateyî zî sey kurdanê ma yê dîasporayî her yew, yew welatêkê Ewropa de bî. Seba komxebate, ne ca, ne fînans nê zî materyalê înan estbî. Bi çi şertê giranan de ameybî têhet, ancax ê zanî.

Ewro xebata Grûba Xebate ya Vateyî verê çiman de ya. Heme cayanê Kurdîstanî ra vila bîya. Ma bi xebata înan xususîyetê ziwanê xo musay û ziwanê xo wanenê û nusenê. Çîyo ke ma tewr zaf keyfweş keno no yo. Xebata înan a.

Ez xo deyndarê înan vînena. Na deyndarîya xo zî wazena ke bi xebate bidî. Goreyê meharetê xo heme enerjîya xo bidî wendekaranê xo ser.

Seke ma vînenî, ziwanê ma roje bi roje ver bi kirmanckîya standarde şino. Şar eleqe ramojneno. No eleqe do bibo laser. Grûba Xebate ya Vateyî game bi game ameya hetanî ewro, la ewro ra pey hewce yo ke ma vaz bidîn.

Bi nê munasebetî ez peşnîyazêkê xo zî vajî. Bi hetkarîya Grûba Xebate ya Vateyî û tayê mamostayê ke ha zereyê welatî ha teberî welatî de yê, seba amedekerdişê mamosteyan çend kursanê kirmanckî Dîyarbekir de abikê.

Ez pêrune rê sipas kena.

Na xebere 1727 rey wanîyaya
ŞÎROVEYÎ
Xarpetij
Xarpetij
sipas pero ra ...
13 Gulane 2011 Îne 22:58