zazaki.net
13 Kanûne 2017 Çarşeme
Girdîya Karakteran : 12 Punto 14 Punto 16 Punto 18 Punto
17 Nîsane 2016 Yewşeme 09:22

Weşanxaneyê Roşna ra Hîrêna Kitabî

Xebere: Newepel

Weşanxaneyê Roşna ra hîrêna kitabî vejîyayî. Bi nê her hîrê kitaban, benê 36 hebî kitabî ke Weşanxaneyê Roşna ra weşanîyenê.

Kitabanê kirdkî ra "Meymanê Homayî" yê Mihanî Licokicî yo, 48 rîpelî yo û tede 99 hebî fiqrayî estê. Warê mîzahî de kitabêko balkêş o; bitaybetî seba merdimanê ke newe musenê wendiş û nuştişê kirdkî, eserêko îdeal o.

Kitab ra yew fiqra wina ya: "Yew merre û leyîrê xwu teber a geyreynê. Reyke de çimê merreyî gineno pisînge ro. Merre sey kutikî keno “ewçe-ewç”. Pisînge senî ke nê vengî şinawena, vana qey kutik o, tersan ra uca ra remena. Merre leyîranê xwu ra vano "Yaaa tûtîno, şima zî bi çimanê xwu dî! Kiçî ziwananê xerîban bizano çiqas faydeyê ci esto!"

Kitabê diyin yê kirdkî "Sanikanê Mamekîye ra" yê Nadîre Guntaş Aldatmaze yo. Kitab verê cû 2013 de hetê Unîversîteya Artuklu ra çap bibi û 116 rîpelî bi. La dima nuştoxe new sanikî û hîrê meselayî îlawe kerdê û kitab sey çapa diyina hîrakerdîye Weşanxaneyê Roşna ra weşanîya. Çapa diyine 168 rîpelî yo.

Folklor seba her miletî zaf muhîm o. Çimkî folklor de kultur, edebîyat û hunerê miletî esto. Labelê seba ma, bitaybetî zî seba ma kirmancan folklor tena folklor nîyo, eynî wext de çimeyo esîl û xas yê ziwanî yo. Kitab de 37 sanikî û hîrê meselayê ke derûdormeyê Mamekîye ra arêdîyayê, heme bi fekê orîjînal yê Mamekîye qisey benê.

Kitabê hîrêyin o bi tirkî "Toplumsal Kürt Gruplarından Zazalar" 168 rîpelî yo, tede des meqaleyî û hîrê roportajî estê. Nuştoxê kitabî Roşan Lezgîn vateyo verên yê kitabî de dano zanayîş ke ey nê meqaleyî mabeynê serranê 2009-2015 de çarçewaya munaqeşeyanê derheqê grûba komelkî ya kurdan zazayan de nuştê û roportajê ke dayê, kitab de ca gênê. Û vano: "Ez hetê kok, mîlîyet, cografya, dîn, ziwan û edebîyatî ra derheqê na grûbe de panoramayêka pêroyî pêşkêş kena." Ancî, wina îlawe keno: "Nê nuşte û meqaleyan de mi bale anta gelêk xebatanê ke verê cû derheqê na grûbe de bîyê ser labelê mi nêwaşt ez ê melumatan neqil bikerî. Çimkî heta ke mumkin o, mi xwu hemet kerd ke ez kitabî nêkerî qalind. Hîna zaf melumatê ke newe arêdîyayê û ancî zanayîş, data û averşîyayîşê ke mi bi hawayêko orîjînal tesbît kerdê, ez nê kitabî de pêşkêş kena." Seba kesanê ke wazenê derheqê kirdan (kirmancan, zazayan, dimilîyan) de bibê wayîrê melumatî no kitab beno çimeyêkê verên yê muracatî.

Înternetî ser o adresa waştişê kitaban: rlezgin@hotmail.com

Na xebere 2127 rey wanîyaya
No nuşte hema şîrove nêbîyo.