zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
12 Temmuze 2018 Panşeme 12:51

Weşanxaneyê Roşna ra Hîrê Kitabî

Mem û Zîna Ehmedê Xanî êdî bi kirdkî zî esta...

Weşanxaneyê Roşna ra hîrêna kitabî weşanîyayî. O yewin Mem û Zîna Ehmedê Xanî ke Murad Canşadî kurmancî ra açarnaya. Diyin, Sîmserkîs (Folklor) ke Îrfan Sîmserkîsijî eserê folklorîkî yê dewa xwu arêdayê. Hîrêyin zî, kitabê şîîran yê Îdrîs Yazarî Destê Zemanî.

Seke yeno zanayiş, Ehmedê Xanî sertacê edebîyatê kurdan şaheserê xwu Mem û Zîne ke 60 qismî û 2657 beytan ra yena pê, bi kurmancî nuşta û 1695 de temam kerda. Hetanî nika tercumeyê gelek ziwanan biya la lehçeyanê kurdkî ra tenya tercumeyê soranî bibî. Murad Canşadî hepisxane de kurmancî ra tadaya zazakî ser, yanî êdî Mem û Zîna Ehmedê Xanî bi kirdkî zî esta.

Kunyeya kitabî wina ya:

Ehmedê Xanî, Mem û Zîne, Kurmancî ra çarnayiş: Murad Canşad, Weşanxaneyê Roşna, Diyarbekir, 2018, 336 rîpelî

Kitabê Îrfan Sîmserkîsijî Sîmserkîs (Folklor) de zî eserê sey vateyê verînan, îdyomî, çibenokî, lezvateyî, duayî, sondî, zewtî, aforîzmayê pîlanê dewe, meselayê derheqê pîlanê dewe de, ancî meselayê gelêrî, estanikî, deyîrî, melumatê derheqê dewe de û gelêk çîyê bînî ke Îrfanî dewa xwu ra arêdayê, sey kitab amade biyê.

Kunyeya kitabî wina ya:

Îrfan Sîmserkîsij, Sîmserkîs (Folklor), Weşanxaneyê Roşna, Diyarbekir, 2018, 224 rîpelî

Kitabê hîrêyin zî bi nameyê Destê Zemanî kitabê şiîran yê Îdrîs Yazarî yo. Kitab de 15 şîîrê ke bi terzê serbest nusîyayê ca gênê.

Kunyeya kitabî wina ya:

Îdrîs Yazar, Destê Zemanî, Weşanxaneyê Roşna, Diyarbekir, 2018, 56 rîpelî

Na xebere 3513 rey wanîyaya
No nuşte hema şîrove nêbîyo.