zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
24 Tebaxe 2013 Şeme 08:09

Weşanxaneyê Roşna ra Di Kitabê Bînî

Xebere: Zazakî.Net

Weşanxaneyê Roşna ra di kitabê bînî yê edebîyatê kirdkî vejîyayî. Yew kitabê şîîran yê Bedrîye Topaç “Wextê Heskerdişî”, yê diyin zî kitabê hîkayeyan yê Erkan Tekînî “Sewdaya Belekine” ya. Bi nînan hûmara kitabanê ma yê hîkayeyan resaye 21 û hûmara kitabanê ma yê şîîran zî resaye hewtês. Bi weşanayîşê nê kitaban, mîyanê serrêk de bî çarês kitabî ke Weşanxaneyê Roşna ra weşanîyenê.

Kitabê Bedrîye Topaç “Wextê Heskerdişî” 72 rîpelî yo û 61 tene şîîrî tede estê. Ziwanê şaîre zaf sade la hetê mana ra zî xorîn o. Bedrîye kitabê xo de wina dest pêkena:

Ez bêvengîya yew vengî ra vişîyaya

Lal a ez 

Bineyke zî heredan a

Ez roja qîyametî ra menda

Rijîyayîye

Bineyke zî şikîyayîye…

Dima yewna şîîra xo de wina dewam kena:

Mi ra wexto bêkes de hes bike

Wexto ke sixletîye tenayî ancena

Wexto ke çemî resenê lewanê mi

Wexto ke ez bena nêmeyê yew koyî

Mi ra wexto viran de hes bike

Wexto ke Hawa saye dana Ademî

Wexto ke memikanê mi ra cuye herekîna

Wexto ke ez bena cinî…

Bedrîye Topaç bi kitabê xo yê hîkayeyan Berê Sûrî reyde kirmanckî de bîye cinîya hîkayenuştoxe ya tewr verêne û xora bi nê kitabê xo yê şîîran zî bîye şaîra kirmance ke tewr verî yew kitabê şîîran neşr kena. Bedrîye Topaç, bi sadeyîya ziwanê xo, bi terzê şîîranê xo, bi şeklê xoîfadekerdişî, heta belkî bi cuya xo zî manena şaîra namdare ya farisan Furûx Ferruxzade.

 Kitabê Erkan Tekînî “Sewdaya Belekine” 80 rîpelî yo û tede heşt hîkayeyî estê. Erkanî hîkayeyanê xo de ziwanêko sade û pak şuxulnayo.

Erkan Tekîn zî sey Murad Canşad, Huseyîn Karakaş û Umer Farûq Ersozî ekolê zindanî ra yo, hefsxane ra nuseno la mekanê zafê hîkayeyanê ey Dêrsim o, cuya Dêrsimî ra qisey keno:

Kenarê Çemê Mizurî de kemere ser o nişt ro. Sey çemî xorîn-xorîn xeyal kerdêne. Çi wext ra henî ronişte yo qet hawîrê (hagîdarê) ci nêbî. Otobuse ra amebî war, qet cayê de nêxercelîyabî, çem girewtbî xo ver, amebî a kemere ser o niştbî ro.”

Erkan Tekîn Dêrsim ra Dewa Hagî ra yo, Bedrîye Topaç zî Dêrsim ra dewa Markasorî ra ya. Murad Canşad, Huseyîn Karakaş û Nadîre Guntaş Aldatmaz zî Dêrsim ra yê. Çêna û xortê pakî yê Dêrsimî way û birayanê xo yê Dîyarbekirî û Çewlîgî reyde ruhê heqîqî yê Dêrsimî newe ra şîyar kenê.

Seba waştişî adresa rlezgin@hotmail.com rê binuse.

Na xebere 2229 rey wanîyaya
No nuşte hema şîrove nêbîyo.