WELÊ SEYÎD RIZAYÎ RA MENDA EZ

Emşo reyna ez ameya, hewnanê yew nuştoxî de bîya meyman.

Mi va ke wirze wextê rakotişî nîyo, wirze yew qelem û yew pelê kaxide bigîre xo dest û tikê (tayê) behsê mi bikere. Derdê mi estê, xemê mi estê mi binuse, derdanê mi, xemanê mi û waştişê mi binuse. Bextê mino sîya birişne qelemê xo ra, kaxidê xo yê sipîy de bextê mino sîya binuse.

Tikê mi bişinasne û mi bide şinasnayîş, derdê mi, dejanê mi û xemanê mi dinya ra vila bikere.

Ez vizêrin nîya, hezer serrî ya. Ez wextanê verînan ra ya, di hezar serrî ya. Ez verisnîya cuyêka zaf kone ya. Ez sey ewroyî çekuya xerîbe nîya. Ez sey ewroyî yew çekuya vînbîyaye nîya.

Ez yew ciwîyayîşo derg û bingeyên a. Ez eslê yew şarê birumetî ya. Xuliqnayîşe însanan, awanbîyayîşê dinya ra nate ez esta. Û heme wextan de ez ciwîyawa.

Mi dewletî awan kerdî, mi welatî kerdî zergun. Mi wextî (esrî) kerdîy a, mi wextî (esrî) qefilnayî. Ez vengêkê rengê asmênî de bîya, tim û tim kewe bîya. Ez azadî de qeydeyêko azad ciwîyawa. Neyarî zaf rey mi ser o kom bîyî, zaf rey neyaran cîfê mi çikna, la ez tu wext binê destê neyaran de nêfatisyawa. Tarîx mi şinasneno, herbê mi şinesnenê, neyarê gonîwerî mi şinasnenê. Terteleyê zilimkaran mi şinasnenê.

Ez zaf rey ameya kiştiş, kamîya mi zaf rey ameya veşnayîş. Ez dejawa, ez qehiryawa, tertelayen de vengê mi mend, veşnayîşê kamîya mi de bermayîşê mi mend. Ewro hema ra zî vengê mi yeno terteleye Dêrsimî ra. Bermayîşê mi mend Zîlan de. Qîjîya mi dinya şinawite Helebçe de. Roboskî de, Rojawa de qîjîya mi zergun a. Gonîya mi hema zî germin herikîyena. Heme goşî bîyê kerr, ziwanî bîyê lal, kes vengê mi, qîjîya mi nêşinaweno û kes behsê mi nêkeno.

Binê nê zilm û zordarî de ez ciwîyawa. Neyaranê mi nêeşkayî ke mi vîn kerê, erdan ser o ziwanê mi lal kerê. Ez semedê şima ciwîyawa, ez ciwîyawa. Mi rîyeçê xo verda tarîx de. Ez herban ra vîyerta, herbê mi şinasnenê, vengê astoran mi şinasnenê, qilicê şerwanan mi şinasnenê. Ez vengê astoran de, meydanê herban de ciwîyawa. Ez vengê xençeran de ciwîyawa.

Ewro goştarîye mi bikerê, heme cayan ra vengê mi yeno, awê Munzurî de, awê Dîcle û Feratî de, awê Muradî de ez herikyena. Hemi rîyayaynê (cehdeyanê) welatî de rîyeçê mi estê. Heme koyan ra vengê mi yeno. Her mezel de, her dar û nebatî de gonîya mi esta. Şarî ameyî kiştiş semedê mi, ez ciwîyawa. Welê Seyîd Rizayî ra menda ez. Newe ra bîya zergun ez kindirê Şêx Seîdî de. Semedê sareyê Yadoyî ciwîyena ez. Vengê lawîkanê Rêncber Ezîzî ra yew dîyarî ya ez. Mi rind (hol) bişinasnê, mi hol fam bikerê.

Ez vengê kamîya to wa. Ez vengê azadîya to wa. Ez vengê ciwîyayîşê to wa, tewr verîn û vengê to yo nikayîn a. Ez vengê estena to wa. Ez rengê to wa. Xo bêveng, bêreng meverde.

Mi hol (rind) bişinasnê, mi hol bidê şinasnayîş.

Ez nêvana ke mi xo vîr ra mekerê. Mi war de meverdê. Ez vana ke xo, xo vîr ra mekerê, xo war de meverdê.

Mi pelan de meverdê, mi kitaban de meverdê. Mi heskerdişê xo, eşqê xo de biciwînê. Bi mi hes bikerê, heskedişanê xo mi de biciwînê.

Hewnanê xo de cayê mi bidê mi. Sey wextanê verînan mi zerrîya xo de, mi çimanê xo de, mi heskerdişê xo de, mi pêrodayîşê xo de, mi qiseykerdişê maya xo de, domananê xo de û mi qiseykerdişê waştîye xo de biciwînê.

Derdê mi estê, xemê mi estê. Ez heskerdişanê şima de cayê xo nêgêna. Ez eşqê şima ra zaf dûrî ya.

Kes bi çekuyanê mi nêvano, “Ez to ra zaf hes kena.”

Ez to ra zaf hes kena maya (dadîya) mi.

Ez to ra zaf hes kena pîyê mi.

Ez to ra zaf hes kena waya mi.

Ez to ra zaf hes kena waştîyê/ya mi.

Ez semedê to mirena heskerdişê mi.

Xemê mi estê, şima mi ra şermayenê. Xemgînîya mi esta, şima mi ra şermayenê. Şima heskerdişê xo, ziwanê şaran de, ziwananê xerîban de anê ziwan. Şima mi ra şermayenê.

Şima mi pelan de verdenê. Şima mi kitaban de verdenê. Şima bi destanê xo mi kişenê, şima mi hesran de fatisnenê.

Reyna zî ez şima ra nêvîyerena.

Reyna zî ez şima ca nêverdena.

Reyna zî ez şima ra zaf hes kena.

Ez teyna semedê şima ciwîyena. Ez teyna semedê vengê şima ciwîyena.

13.10.2013