zazaki.net
26 Temmuze 2017 Çarşeme
Girdîya Karakteran : 12 Punto 14 Punto 16 Punto 18 Punto
07 Temmuze 2014 Dişeme 20:32

Şeyda Asmîn û “Zeman Sey Fekê Kardî bî”

Bedrîye Topaç

Kirmancîya rindeke rê Şeyda rayîr kena ra. Ez fekê kardî de rêça Şeyda de rayîr şona. Reça Şeyda zaf-zaf qayîm a. Merdim xo ra bawer rêça aye de şono. Şeyda ge serê yew koyî de, ge mektebanê tarîyan de, ge-gane zî sêneyê yew cinîye de ya. Mi rê rayîr kena ra. Hîkayeyanê Şeyda de merdim nêşikîno yew ca de bimano. Tim gêreno. Koyan ra gêreno, dewan ra gêreno. Ruh û rîyê merdiman ra gêreno. Çekuyanê aye de merdim beno merdim û xo nas keno. Kamîya xo, welatê xo vîneno.

"Ricifîyayêne. Sey mîlçika serê vewre ricifîyayêne. Porê xo yo derg û sîya bîbî vila. Çimanê xo de qisawetêk ke hetanî a roje mi qet çimêk de nêdîbî estbî. Se bîbî? Çîyî a ardîbî nê halî? Ma qey ci rê serd bî? Însan serd û seqemê zimistanî de kî nîya nêbeno. Mi va çimanê xo de qisawet esto ne? Nê, nê çi qisawet? Çîyo ke çimanê aye de asayêne çekuya qisawetî ci rê zaf sivik manena." (Zeman Sey Fekê Kardî Bî, 63)

Hîkayeyanê Şeyda de tim wina yo. Merdim tim germinîya zerrî û vijdanî vineno. Yew nuştoxe qehremana xo rê wina dejena. Zerrîya xo wina zîz kena û wina wayîr vejîna. Merdim pêro qehremanan de nuştoxe vîneno. A xo qet nênimnena. Şeyda ruhê pêro qehremananê xo de ya. Înan de bermena, huyena, tersena û yan zî omid kena.

"Çimê xoyê girsî kerdîbî vît aye de nîyadayêne. A kî ey ra tepîya nêmendîbî. Aye kî çimê xo yê sîyayê girsî vîtê ey kerdîbî. Nîya demêk yewbînî de nîyada. No dem çiqas bî aye qet nêzanit. Sanîya bî, deqa bî? Saete bî? Çiqas ontîbî aye nêzana. Teyna no zanitêne ke aye rê zaf derg ameybî. O ame xo, aye de peşmerîya, bi vazdayîş şî resa cendermanê bînan." (Zeman Sey Fekê Kardî Bî, r. 141)

"Omid vîndî nêbeno." Erê, Şeyda ma ra tim wina vana, Bêrîvana aye ma rê wina vana. Însanbîyayîş çiqas pîroz o, ana vîrê ma.

"Oooo

Alo vingo

Mastê mîya

Ser selika

Bin qulika

Cila here

Teqle bîya

Ser ra şîya

Ti ve-cî-ya."

 

Û çekuyê Şeyda domanîya ma ra, dewanê ma ra ma rê vengan anê. Gelo şima vengê huyayîşê domanan anê xo vîr? Hîkayeyanê Şeyda de domanî tim der û dormeyê şima de yê, şima înan de rayîr şonê û vengê girpayîşê zerrîya înan şima rê zaf nas yeno. Tewr çîyo weş kî cinî û camêrdî çekuyanê aye pîya û têdûşt de xemelnenê.

Raywanîya Şeyda raywanîya cinîyanê kirmancan a û ez omid kena ke na raywanîya pîroze de rayîr û rayîrwanê ma bizêdîyê. Wa Şeyda bi zerrî û çekuyanê xo bizêdîyo, vila bibo...

Na xebere 2701 rey wanîyaya
No nuşte hema şîrove nêbîyo.