zazaki.net
25 Teşrîne 2017 Şeme
Girdîya Karakteran : 12 Punto 14 Punto 16 Punto 18 Punto
21 Temmuze 2013 Yewşeme 14:49

Roportaj Yucel Eşsîzogluyî Reyde

Roportaj: Seyîdxan Kurij

Keremê xo ra ti eşkenî wendoxanî ma rê xo bidî sinasnayîş? Ti senî yew ca de, senî yew keye de bîyî pîl?

- Ez serra 1963 di Amed, Çêrmûg di, dewda Sînagi di amao dinya. Hetanî mektebo sifteyin mi dewda xo di wend. Dima jî mi sûkda Çêrmûgi di wend. Bahdo mi Zaningeyê Anadolu yê Eskîşehîrî qedîna. Mi 25 serrî memurîyetê kerde û ez 2004 di bîyo teqawit.

To çi wext û senî dest ci muzîk kerd û ti çi wext ra kurdî vanî?

- Ez qeçekîn ra tembur cineno. Wexto ki ez duwês serre bîyo mi dest bi temburî kerd. Labrê ziwandê dayîkda xo di viraştişê muzîkî 1998 di dest pêkerd. Ez 1998 ra hetanî nika ziwandê xo zazakî di hem şîîran nuseno, hem deyran virazeno.

Ti kilamanî xo senî vîcnenî, ti xo muzîk û tekst nusenî, yan kes to rê tekstan nuseno, yan zî şîîranî şaîranî kurdan gênî û ci rê muzîk virazenî?

- Kilamê ki mi viraştê qesê pêrine yê min ê. Mîyan di jû kilam esta qesê ci jû embaza mi nuştê. Namê ci Sevîm Aydin a. A Zaningeyê Artuklu di zazakî ser o tehsîlo berz gêna.

Ti muzîkê xo sinî name kenî? Ti kam tarz muzîk virazenî?

- Ez vano muzîko ke ez virazeno nameyê ci "muzikê şardê (halk müziği)" ma o.

Kilamî otantikî kirdkî, benî zafveng (çok seslî), yanî zafvengbîyayîşî rê minasib î?

- E, kilamê ma zafvengbîyayîşî rê minasib ê.

Tesîrî kam dengbêj yan zî hozanî to ser o esto?

- Zazakî ser ez Nîlufer Akbal, Mikaîl Aslan, Ahmet Aslan û M. Kemal Kahramanî teqîb keno. Tesîrê înan mi ser o esto. Labrê ez muzîkê tirkî jî vano.

Ti kilamanî mintiqayanî bînan zî, mesela Çewlîg, Gimgim û Dêrsimî vanî?

- Raşt a, ge- ge ez kilamanî hetandê bînan jî vano, mesela Dêrsim, Çewlîg, Gimgim...

To heta înkê çend albumî viraştê? Eleqe senîn o? Klibî to estî?

- Heta nika mi jew album veti. Nameyê ci “Az ra Az” o û zazakî yo (Nesilden Nesile Zazaca 2- 3). Labrê no album teniya yê mi nîyo. Album di hewt hunermendî estê. Hewna mi klîb nêviraşta...

Nê demanî peyênan de hunermendê kurdî, grûbî muzîkî yê kurdan zaf festîvalan de ca gênî, sebebî nê eleqeyî çi yo?

- Ez vano şarê ma zaf qayîl beno, corna hind zaf grûbê muzîkê kirdkî veciyayê.

Ti kam hacetanî muzîkî cinenî?

- Ez tembur (bağlama) cineno, taynê gîtar jî zano bicenî. Hevêna org zano bicenî.

Ti nika halî muzîkî kurdî senî vînênî?

- Wezîyetê muzîkî rind o, labrê semedê na înternet ra rotena albuman hewl nîya.

Derheqî minasebetî hunermendan û poltîka de ti wazenî se vajî?

- Ez girêdayê ju partî nîyo. Partîya mi şarê ma o. Labrê ma gerekana ziwandê xo ser o zaf bixebetîmî, qeçekanê xo bimusnimî. No maveyn di ez wazeno zazakî ser o qenalê televîzyonî abîyê.

Nika çi xebatê to esta? Ewro ra tepîya ti wazenî se bikerî?

- Ez nika teqawit o. Ez muzîkî ser o amatorkî xebetyeno. Na ra tepîya ez wazeno bi xo tenîya jew album vejî, ew nê şîîranê xo jew kitab di arêdi pêser. Qandê nê roportajî ez to rê spas keno. Berxudar be, weş û war be. (*)

______________

* No Roportaj “Newepel, Rojnameyo Kulturî, Hûmare 51, Dîyarbekir, Gulane 2013, r. 4” de weşanîyayo.

Na xebere 1814 rey wanîyaya
No nuşte hema şîrove nêbîyo.