zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
11 Sibate 2013 Dişeme 03:20

PÎZOZ XATÛNI

Arêkerdox: Mujdat Gîzlîgol
Mintiqa: Sêwregi

Beno nêbeno yew moza qeri bena. Nameyê na mozi Pîzoz Xatûni bena. Rojê Pîzoz Xatûni qulda xo ra vijêna. Pîzoz Xatûni wazena ki xo rê mêrde bikero. Labelê mozi zaf qeri bena. Coki ra kes ci nêgîno. Pîzoz Xatûni der û dormedê xo di geyrena. Şina xo vilikan a xemilnena, rîyê xo kena sipî û surme ancena çimandê xo û xo kena xaseki. Dima dêran vana û geyrena. Vana: 

- Mi anti xo rî kilwele. / Ez ha geyrena mêrde.

Mozi zaf şina tayni şina, raştê yew şiwaneyî bena. Şiwane vano:

- Moza qeri ti ya şina kotî?

Mozi bena hêrs vana:

- Ti do vajê “daya xala, maya xala, sakî surmî saya xala, ti ya şina kotî?”

Şiwane vano, wa bo û vano:

- Daya xala, maya xala, sakî surmî saya xala, ti ya şina kotî?

Pîzoz Xatûni vana:

- Ez ha xo rê geyrena mêrde. Ti mi nêgînê?

Şiwane vano:

- Ez to gêna.

Pîzoz Xatûni vana:

- Ez to hêrsi kera ti yê çiçî ya mi fînê?

Şiwane vano:

- Ez ha lûlîya xo ya to fîna.

Senîn ki şiwanê wina vano Pîzoz Xatûni tersena vana:

- Ez to nêgîna.

Pîzoz Xatûni wija ra kewna dûrî. Dêran kena û vana:

- Mi anti xo rî kilwele. / Ez ha geyrena mêrde.

Mozi zaf şina tayni şina na fini raştê citêrî yena. Citêr vano:

- Moza qeri ti ya şina kotî?

Mozi bena hêrs vana:

- Ti do vajê, “daya xala, maya xala, sakî surmî saya xala, ti ya şina kotî?”

Citêr vano, wa bo û vano:

- Daya xala, maya xala, sakî surmî saya xala, ti ya şina kotî?

Pîzoz Xatûni vana:

- Ez ha xo rê geyrena mêrde. Ti mi nêgînê?

Citêr vano:

- Ez to gêna.

Pîzoz Xatûni vana:

- Ez to hêrs kera ti yê çiçî ya mi fînê?

Citêr vano:

- Ez ha misasîya xo ya to fîna.

Senîn ki citêr wina vano, Pîzoz Xatûni tersena vana:

- Ez to nêgîna.

Pîzoz Xatûni wija ra kewna dûrî. Dêran kena û vana:

- Mi anti xo rî kilwele. / Ez ha geyrena mêrde.

Mozi zaf şina tayni şina na fini raştê vergî yena. Verg vano:

- Moza qeri ti ya şina kotî?

Mozi bena hêrs vana:

Ti do vajê “daya xala, maya xala, sakî surmî saya xala, ti ya şina kotî?”

Verg vano, wa bo û vano:

- Daya xala, maya xala, sakî surmî saya xala, ti ya şina kotî?

Pîzoz Xatûni vano:

- Ez ha xo rê geyrena mêrde. Ti mi nêgînê?

Verg vano:

- Ez to gêna.

Pîzoz Xatûni vana:

- Ez to hêrs kera ti yê çiçî ya mi fînê?

Verg vano:

- Ez ha to bigîra dindanandê xo mîyanî û to bicawa.

Senîn ki verg wina vano Pîzoz Xatûni tersena vana:

- Ez to nêgîna.

Pîzoz Xatûni wija ra kewna dûrî. Dêran kena û vana:

- Mi anti xo rî kilwele. / Ez ha geyrena mêrde.

Mozi zaf şina tayni şina na fini raştê merrî yena. Merre vano:

- Moza qeri ti ya şina kotî?

 Mozi bena hêrs vana:

- Ti do vajê, “daya xala, maya xala, sakî surmî saya xala, tîya şina kotî?

Merre vano, wa bo û vano:

- Daya xala, maya xala, sakî surmî saya xala, ti ya şina kotî?

Pîzoz Xatûni vana:

- Ez ha xo rê geyrena mêrde. Ti mi nêgînê?

Merre vano:

- Ez to gêna.

Pîzoz Xatûni vana:

- Ez to hêrs kera ti yê çiçî ya mi fînê?

Merre vano:

- Ez ha rûwenê bisawa poçika xo û hingemîni bisawa gumeda to û to fîna.

Mere senîn ki wina vano weşê Pîzoz Xatûni şino. Pîzoz Xatûni vana:

- Ez to gêna.

Merre û mozi keyeyê merrî di veyveyêndo weş kenê. Enbazê merreyî kilaman vanê saz û tenbûri cenenê. Veyvi û zama ya xemilnenê. Hîrê rojî û hîrê şewî reqisnenê. Veyve qedêno, zaf şino tayn şino, keyeyê merre û mozi di teba nêmaneno. Merre vano, ez ha şina keyeyê axayî ra ma rê çî bitirawa. Merre tewreyê xo gêno û şino. Mozi tenî ya manena. Çendi rojî kewnê werte, merre nîno. Kêfê Pîzoz Xatûni remeno. Mozi şina geyrayîş. Raştê dijeyî yena. Dijê vano:

- Xeyr o Pîzoz Xatûni çirê ti ya tenî ya?

Pîzoz Xatûni vana:

- Mêrdeyê mi şî keyeyê axayî ma rê çîyê werdî bîyaro. Labelê hewna nîyame. Merrî ra mêrde nêbeno. Ti mi nêgînê?

Dije vano:

- Nê ez to nêgîna.

Pîzoz Xatûni peyi qehrêna. Tayni şina zaf şina raştê awi yena. Postalê ci guneno awi mîyan ro. Mozi senî ki kena postalê xo bigîro, a zî kewna awi mîyan. Wija ra suwarî ravêrenê, Pîzoz Xatûni awi mîyan ra vana:

- Suwaro hevdel mewdel, şima şinê keyeyê axayî mêrdedê mi rê vajê Pîzoz Xatûni kewta çalda arwanî.

Esparî şinê keyeyê axayî. Axayî ra vanê moza qeri kewta çalda arwanî. Merre senî ki pey hesêno tewreyê xo roneno û remeno. Merre şino mozi heteki û vano:

- Destê xo bidi mi ez to banca.

Pîzoz Xatûni vana:

- Ez to di qisey nêkena. To ez tenî ya verdaya û ti şîyê.

Merre peyi xo keno vera mozi, mozi bena boçikta merrî û awi mîyan ra vijêna.

Istanika min a sî periki

Geyrena bi diki-diki

Xecê wayê golikan teber ki

Tenekê rêxi misasî sere ki

Gilandê Zîni vera ki

Zimbêlandê Memî sere ki*

__________

* Na sanike "Newepel, Rojnameyo kulturî yo 15 roje, Hûmare 36, Dîyarbekir, 01-16 êlule 2012, r. 7" de weşanîyaya.

Na xebere 3102 rey wanîyaya
No nuşte hema şîrove nêbîyo.