Pêşnîyazêk

Tirkîya de 15ê tebaxa 2006î ra nat o bi kurdkî rojane rojnameyêk vejêno. Seba ke zext û zorê dewlete ser o zaf ê, rey-rey yeno girewtene, bi yewna nameyî weşana xo domneno. Name bivurîyo zî muhtewa û polîtîkaya xo eynî ya.

Da-vîst serran ra ver munaqeşe bîyêne ke kurdkî esta yan çin a. Ewro bi kurdkî roje bi roje rojnameyêk vejîyeno û sera-ser heme Tirkîya de roşîyeno, vila beno. Merdim pê îftîxar keno!

Ya, merdim pê îftîxar keno, no yewna çî yo; la ez polîtîkaya weşane ya nê rojnameyî rast û adil nêvînena.

Rast nêvînena, çike qismê kirmanckî (zazakî) de xeletî zaf ê, kirmanckî nê xeletîyan ra zerar vînena.

Adil nêvînena, çike nîsbetê kirmanckî % 3 bîle nîyo!

Yê nê rojnameyî servîsê xo yê kirmanckî çin o. Rîpelê xo yê ke daîmî kirmanckî yê, çin ê. Tena şeş kunciknuştoxî estê, her kunciknuştox hewteyêk de yew nuşte amade keno.

La ziwanê nuştoxan yewbînan nêgeno. Ziwanê yewerî ke fehm bibo, yê yewerê bînî fehm nêbeno.

Di nuştoxê hêcayî bi ziwan û gramerê standardî nusenê. Nuşteyê xo averberdişê ziwanê sîyasetî û aktuelkerdişê kirmanckî rê xizmet kenê. Tede bellî yo ke nê di nuştoxê hêcayî kirmanckî ser o sereyê xo rencnenê, cehd kenê ke ziwanê xo hîna weş û delal bikerê.

Di nuştoxê xo, çiqas bi kirmanckî eleqedar ê, ez nêzanena. Ma bivajê, çiqas wanenê, çiqas gramer û standardîzasyon ra xeberdar ê. Nê kesî, wexto ke bi kirdaskî yan zî tirkî nusenê, rastnuştişê ci ser o sey çimê xo lerzenê. La dore ke ameye kirmanckî qet rastnuştiş nêanê xo vîr.

Maşela di nuştoxê bînî estê! Her diyan sere şanayo pê ke ti vana qey kirmanckî nînan afernayo! Qaydayanê çewt û çewtviran anê dekenê mîyanê ziwanî ke binê kemera huşke ra bo! Ti vana qey nînan ra ver kirmanckî qet nênusîyaya. Uslubê ci de qet tehmê kirmanckî çin o. Êdî ziwanê Mançurya yo êdî ke ziwanê Papua-Gîneya Newîye yo… Tena zagonê merdimî şono ser ke mîyan ra çend çekuyê xo kirmanckî yê!

Mi do qet name medayênê la ez tîya de mecbur a. Yewbîna, pêşnîyaza mi îfade nêbena. Yanî nuşteyê mi nêgineno cayê xo.

Xoser Welat…

Ez nêzanena kam o çi kes o, kirmanckî ser o xebat û lebata xo çi ya? Ez texmîn kena kam o, la texmînkerdiş yewna çî yo, zanayîş yewna çî… Texmînkerdiş cayê zanayîşî nêgeno.

Ça ra texmîn kena ez?

Tena yew çekuya xo bes yena!

No nuştoxê ma yo delal sereyê her qisaye xo de vano “ro ser”! Keyfê xo rê vano “ser o”. “Ro ser” ha “ro ser”! Nata “ro ser” weta “ro ser”!... Tebî kirmanckî de çîyêko winasî çin o. La seke nuştoxê ma yo delal “formel” fikirîyeno û kirmanckîya nuştekîye xo ra dano dest pêkerdene…

Pêşnîyaza mi a ya ke no nuştoxê ma yo delal nameyê xo bibedilno! Bikero ROSER WELAT!...

Ez ci rê selam û hurmetê xo vana û ez hêvî kena ke mi nêşikneno!