zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
22 Hezîrane 2013 Şeme 14:20

Nuşteyê Edîtorî yê Rojnameyê Newepelî-49

Roşan Lezgîn

Demeyê vetişê Newepelî de ma gelek serebutê tehl û şîrinî ciwîyayî, gelêk tecrubeyê ma virazîyayî. Ez wazena qalê çend serebutan bikerî, wa tarîxî rê sey yew notî bimanê.

Destpêkê vetişê Newepelî de ma her hûmare ra qasê 100-150 hebî şawitêne Çewlîg. Yew xortê ke lîse de wendêne rojname qeweyan ra, esnafan ra çarnayêne, heme zî rotêne. Heba rojnameyî yew TL bî, nîme ey rê bi, nîme ma rê şawitêne. Hem wendoxan rê, hem rojnameyî rê hem zî vilakarî rê faydeyê xo bîyêne. La badê çend hûmaran, xebere ameye ke yew polîs lajekî teqîb keno, rojnameyan ci ra gêno û ey tehdîd keno ke vila nêkero.

Ê polîsî hûmarê 4 û 5. pîya lajekî ra girewtî. Heta ke eynî merdim şibi Bilgi Kitabevi ra zî Newepel arêdabi berdbi.

Ez û Bîlal ma weriştî şî Çewlîg. Badê ke ma derheqê nê polîsî de melumatî arê dayî, ma şî verê amirê asayîşî. Ma hal û mesela amirê înan rê qisey kerd. Tabî, camêrdî îtîraz kerd, va, polîs nîyo, eke polîs bo, gama ke dest bido rojnameyî ser ganî zabit bigîro. Va, beno ke merdimêk xo dekerdo rolê polîsî û rojnameyî lajekî ra girewtê. Ma va, eke wina yo, merdimêko sivîl eşkeno Çewlîg de xo bikero rolê polîsî, şima nê merdimî tespît nêkerê, na bena kêmanîya şima ya hîna pîle.

Ma şî şubeyê komela heqanê merdiman yê Çewlîgî de melumat da çapemenîye. Dima ma şî dozgerîye de gerre kerd. Êdî kesî eleqeyê Newepelî nêkerd, la dima sewbîna behaneyî peyda kerdî û lajek tersna. Kitabroşî zî tersan ra va, ez nê rojnameyî nêroşena. A roje ra nat ma qasê 30 hebî şawenê Çewlîg, tena yew kafeya kulturî de roşîyenê.

Çîyo ecêb, nê polîsê ke dest nayêne rojnameyê ma ser, o zî kird (zaza) bi, şarê yew qezaya Xarpêtî bi. Tu selahîyetê ey ke dest bido rojnameyî ser çin o. La polîsîya xo suîstîmal keno û bi hawayêko bêqanûnî nêverdano rojnameyo ke bi ziwanê baw û kalanê ey vejîno vila bibo. Tayê embazan va, nê polîsî vato, çira no rojname vano zazayî kurd ê, coka ez nêverdana vila bibo.

Destpêk ra ma hertim rojname şawenê Xarpêt. Jîyan Kitabevî esto, ma ucayî rê şawenê. Verê cû ge-ge ma dayêne mînîbuse, Xarpêt de termînalê mînîbusan de buro de ronayêne, yew mamostayê ma esto, şîyêne uca ra girewtêne, berdêne Jîyan Kitabevî. Dima ma ewnîya ke zehmet beno, ma êdî pê kargo şawit, heqê kargo 12.5 TL yo. Ma 15 hebî rojnameyan şawenê, eke heme biroşîyê, 5 TL kitabroşî rê 10 TL zî ma rê yê. Hetanî hûmara 46. tim wina bi. La seba ke pê posta erjan o, ma zî hetê madî ra tengane de bî, coka ma hûmara 47. pê posta şawite.

Rojnameyê her cayî şi resa cayê xo la yê Xarpêtî nêşi. Xarpêt ra ma gêrayî, va, rojname nêameyo. Ma va, zehmet nêbo, şirîn postaxane ra bipersîn. Wayîrê Jîyan Kitabevî şi postaxaneyê Xarpêtî, pers û persîyar kerd, la tu rêçe nêdî. Paketa rojnameyê ma bîye vîndî şîye.

Xarpêt de yew embazê ma esto, mamostayêko erjaye yo. Seba ke postaxane de şinasîyê ey estê, o bi xo werzeno şino. Teqîb kenê, gêrenê. Axir ewnîyenê ke paketa rojnameyê ma ha postaxane de yew goşeyê kolîyanê bêwayîran de. Yanî memurê postaxaneyî wezîfeyê xo suîstîmal kenê û bi zanayîş rojname vila nêkenê.

Embazî vanê, nê memurî zî kird (zaza) ê, şarê a qezaya Xarpêtî yê. Polîsê ke Çewlîg de wezîfe keno, hemşerîyê ey ê. Memurê postaxaneyî ewnîyenê ke rojname bi ziwanê înan o, nêwazenê rojname vila bibo.

Tayê merdimî estê, nuşteyanê xo de vanê, hende rojnameyê kurdan estê, qey yew rojname bi zazakî nêvejîyeno? Nika ke rojname bi zazakî esto, werzenê asteng kenê. Na rey vanê, eyla çira yew televîzyon safî bi zazakî çin o!

Madem mi qalê serebutan kerd, ez yewna zî îlawe bikerî. Ma ke hûmara yewine vete, Dîyarbekir de ez çend qirtasîye û rojnameroşan ra gêraya. Mi va, eke mumkin o, nê rojnameyî zî standê xo de ronîn. Eke roşîya nême şima rê nême bidîn ma. Wayîrê yew qirtasîye ke hem malimîye keno hem zî ê karî keno, bi hêrs va “Qey şima wina cîya rojname vejenê? Azadiya Welatî de binusîn! Ez tena yew rojnameyê kurdan roşena.” Mi va, “Zaf normal o ke çend tene rojnameyê kurdan estbê.” Mi standê rojnameyan nîşanê ey da û mi va, “Mamosta, dê hela biewnîye, da-vîst tene rojnameyê tirkan estê. Ti hemîne roşenê. Qey yê ma kurdan di hebî bê, qîyamet werzeno?” Labelê mamostayî fek îtîrazê xo ra veranêda û rotişê Newepelî qebul nêkerd. No mamosta zî kird (zaza) bi.

_______________

* Newepel, Rojnameyo kulturî yo 15 roje, Hûmare 49, Dîyarbekir 16-31 adare 2013, r. 2

Na xebere 1100 rey wanîyaya
No nuşte hema şîrove nêbîyo.