zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
20 Oktobre 2012 Şeme 06:19

Nuşteyê Edîtorî yê Rojnameyê Newepelî-39

Roşan Lezgîn

Ma rewna ra behsê rewşa xo nêkerdo. Ez sere de naye vajî. Hetê ziwanî ra, eke ma xo û miletanê bînan yan zî kirdan û grûbanê bînan yê kurdan, mesela, ma xo û kurmancan yan soranan bidîm têver, rewşa ma başe nîya! La eke ma emserê xo bi par yan pêrarî ra bidîm têver, hetê ziwanê nuştekî ra ma gamê zaf muhîmî eştê. Nika welat de Newepel merkezê averşîyayîşê ziwanê nuştekî yê kirdkî yo. Roje bi roje dorê ma hîna beno sixlet. Mesela, zafê wendekaranê kirdkî yê unîversîteyan, wendekarê lîsansê berzî, radyo û televîzyonî ma ra, xebata ma ra îstîfade kenê.

Çarçewaya xebata ma de, yanî bi ronayîşê komela Ziwan-Komî û weşanîyayîşê Newepelî kirdkîya (zazakî) nuştekî mîyanê şarî ra hîna vêşî vila bîye, kulturê wendişî virazîya, bi seyan kesî musayî wendiş û nuştişê kirdkî. Hetanî na hûmara ma qasê se û vîst kesan ma rê nuşto. Nînan ra nêzdîyê se kesan reya verên a ke Newepelî reyde dest bi nuştiş kerdo. Zafê nînan êdî daîmî nusenê. Heto bîn ra, herçiqas rîpelê Newepelî tay ê, pancês rojan ra reyê vejîno la hetê muhtewa ra -eke ma rewşa kirdkî bigêrîm verê çimî- kalîteya xo qet zî xirab nîya. Ma folklor, edebîyat û kulturê ma ra gelek çîyê muhîmî ke vîndî benê şinê arê dayî, qeyd kerdî. No serkewtişêko heqîqî yo. Amayeyê ma ser o tesîrê xo zaf beno.

Ma destpêkê vetişê rojnameyî de zehmetîyê zaf cidî antî. Hetê tayê nezanan ra zaf neheqî bi ma bîye. La ma zanayêne ma ha se kenê; ma hêzê xo bawerîya miletê xo ra, hîsanê xo yê neteweyî ra girewt û ma rayîrê xo ra dewam kerd. Nika ke ez ê rojan ana vîrê xo, ez bi sebatê ma îftîxar kena. Ewro moralê ma zî rewşa ma zî destpêkî ra başêr a. Şarê ma ma ra bawer kerd, ê munaqeşeyê vengî ke enerjîya ma tewş de berdêne apey mendî. Nika ma hîna vêşî bi moral û bi tecrube ewnîyenê amayeyê xo ra.

Vetişê rojnameyî karêko basît nîyo. Mesref wazeno, kede wazeno, wext wazeno, eleqe wazeno… Hema her hûmare de mesrefê metbea, posta û kargoyî dorê 600 TL pere şino. Mîyanê ma kurdan de yan gereka partîyêk yan şîrketêko tîcarî yo xurt nê karî bikero. La bi rastî ma çend kesî û çend embazê delalî ke nê karî ra bawer kenê, na yo ma hetanî hûmara 39. zî ameyî. Mi verê cû behsê înan kerdo. Piştgirîya înan dewam kena.

Ewro hedefê ma no yo ke, tewr tay ma wazenê hetanî hûmara 48. zî nê rojnameyî dewam bikîm. Uca ra pey, ma do newe ra yew muhasebe bikîm.

Mi behsê piştgirîye kerde. Tayê embazê delalî estê ke piştgirîya ma kenê la nêwazenê ma nameyê înan binusnîm. Ma înan rê zaf sipas kenê.

Yew embazê ma yo delal esto, Îstanbul de maneno. Dr. Cemîl Robar. Par komutê otomatîk dabi hesabê xo, hetanî aşmêk verê cû, yanî tam duwês aşmî her aşme ma rê 100 TL şawitêne. Ma ey rê zaf zaf sipas kenê. Çendeyêk verê cû, yew wendekarê unîversîte, tehtîlê hamnanî de şîyo xo rê xebitîyayo. Ame, 100 TL ardimê ma kerd. Ancî, mesrefê na hûmare kek Wedat Sayginî ma rê Îstanbul ra şawit. Ma şexsen kek Wedatî nêşinasnenê la înternetî ser o têkilîya ma virazîya, ma ey rê zaf sipas kenê.

Nê ardimî tersan ra yan tehdît ra nîyê, bi hesab û kitabê menfaetêkê şexsî zî nîyê. Temamen keremê zerrî ra, bawerîye ra yê. Coka ma rê zaf zaf qîymetin ê. Ma hemîne rê zerrî ra yew bi yew sipas kenê.

Hewceyîya ma bi ardimî esta. Seba ke ma nê karî dewam bikîm, ganî nê ardimî zî dewam bikê. Keda kesî, ardimê kesî ma het vîndî nêbeno. Kam çi ardim keno, eke ê bi xo nêwazê ma behs bikîm ne tede, ma kede û ardimê înan tîya de nusenê ke wa tarîx de qeyd bibo, wa bizanîyo.

Nika ma venga her kesî danê. Kirdênê, kêmanîyêka ma ya zaf muhîme esta. Cayê ma çin o. Eke Dîyarbekir de yew cayê ma bibo, ma do na xebata xo hîna zaf rindekêr aver biberîm. Kanê xêrxwazêk yan çend neteweperweran ma rê yew dayre kîra bikerdêne yan bêkîra bidayêne ma yan zî biherînayêne!…

Eke yew cayê ma estbo, ma do xebata atolyeyan bidîm dest pêkerdene. Mesela, tewr tay ma do yew grûba wendişî, yew grûba nuştişî, yew koma muzîkî, yew koma tîyatroyî awan bikîm. Parî ra nat bî hewt rey ma kurs danê. Labelê ma şinê komelanê bînan de danê. Eke cayê ma estbo ma do cayê xo de bi hawayêko daîmî nê kursî bidîm. Nê mumkin ê, ma eşkenê bi rehetî nînan bikîm. Ma do cayê xo bikîm yew merkezê kulturî ke tede tena huner, edebîyat û kulturê kirdkî (zazakî) geş beno. Kirdê (kirmanc, zaza, dimilî) ma tede kom bibê, şêwr û mişawireyê xo bikê. Ma rê yew ca ferz o…

Ma miletêko bêdewlet ê, ma bindest ê. Tu xeyrê dewleta tirkan ma rê çin o. Ma mecbur ê ke ziwan, huner, edebîyat, kultur û nasnameyê xo yê neteweyî xo rê bi xebata xo ya sivîle aver biberîm. Sewbîna çareyê ma çin o. Sewbîna rayîr ma ra nêaseno.

De haydên!

Ma pîya yewna game bierzîm…

_______________

* Newepel, Rojnameyo kulturî yo 15 roje, Hûmare 39, Dîyarbekir 16-31 oktobre 2012, r. 2

Na xebere 2994 rey wanîyaya
ŞÎROVEYÎ
bawer
servet tezel
merheba şımari gele hevalan xevata şıma zaf çiko mübarek u zora ez bawer kena pe xevata şıma ma paşta xı keni raşt.xatıre şıma
25 Oktobre 2012 Panşeme 08:17
de haydê ey şarê zazayan fedakarey bikimi.
mehemed çelîkten
roşan abî, ez trabzondê talebeyê universîteyonê. nê girwonê şima zaf sînanê, cira zaf hes kenê. ez vazanê ki, şimarê çend mi destra eno se ardim bikerî. mirê jê hûmareyê hesabê ZİRAATê birêşi(Bişawi). ez şimarê çend eşonê se ardim kenê.

EZO TİMÛTİM ŞİMA PEYRÊ(şengûşij)

ZAF SPAS

Bira,
Seba eleqeyê to, seba nê hesasîyetê to zaf sipas.
Ti mektebê xo bi selametî biwane.
Kam gama ke to wendişê xo temam kerd, dest bi kar kerd, hem ti bi xo nê xebatan bike hem zî ardimê ma bike...
Ez to rê zaf selamî kena.
22 Oktobre 2012 Dişeme 03:35
xero
mirza ciwan
merhaba şîmar ez nuşteyî edÎtore brez Roşan Lezgin ra zaf dejiyaya zone ma no halıd gerâ ma pê wayir vej. no derheqid çine ma destra yenû ma ra vaji. ez wendekar a rojname 39. 4 rojo ma dest nÎkot gelo çira? çewlig ra ez ha nisenu şima bumun weşi

____________________________
Merheba bira,
Seba hisîyatê to zaf sipas.
Rewşa ma çi ya, ma bi ziwanêko zelal, a vata. Ne zêde ne kêmî.
Kamî ma rê ardim kerdo mi nuşto.
Ma hûmara 39. şawita Çewlîg, nika uca esta.
Zaf selamî...
20 Oktobre 2012 Şeme 15:13